Nga Tetova, Albin Kurti: Sa më shpejtë të nisin punimet në rrugën Prizren-Tetovë

Në qiell Prizreni dhe Tetova kanë qenë një qytet, por kur i ka sjellë Zoti në tokë në mes është vënë mali sharr dhe janë bërë dy qytete, tha Albin Kurti para qindra qytetarëve të malësisë së Tetovës që ishin mbledh në fshatin Vincë për të pritur Kryeministrin e Kosovës, i cili me ftesë të kryetarit të Komunës së Tetovës, Bilall Kasami, mori pjesë në përurimin e një aksi rrugor, nga Tetova në fshatin Vincë.  

Me këtë rast Albin Kurti sqaroi se studimet e fizibilitetit për ndërtimin e rrugës Tetovë-Prizren janë kryer dhe se kjo rrugë është një marrëveshje mes dy qeverivë, asaj të Kosovës dhe asaj të Maqedonisë së Veriut.

“Natyrisht që kjo rruga që pamë këtu është rrugë e brendshme e Komunës por ne jemi shumë të interesuar që të ecim sa më shpejtë për lidhjen infrastrukturore të Prizrenit dhe Tetovës që pra në qiell ishin një qytet e në tokë janë dy, përmes aksit i cili parasheh edhe një tunel. Në bazë të llogaritjeve, parallogaritjeve të cilat janë bërë, nuk është një kosto shumë e lartë, është e përballueshme por kthimi në këtë investim është i jashtëzakonshëm meqenëse shkurtohet rruga, fitohet koha dhe përfitojnë edhe qytetarët edhe ekonomia,” tha Kryeministri i Kosovës ndërsa Zv/ministri i Infrastrukturës i Kosovë, Hysen Dyrmishi duke shtuar se rruga Prizren-Tetovë është një nga prioritetet e qeverisë së Kosovës.

“Një studim fizibiliteti ka qenë që është bërë disa vite më përpara nga Qeveria e Maqedonisë së Veriut dhe pas analizës që i kemi bërë këtij studimi të fizibilitetit i kemi kriju edhe dy komisione të përbashkëta ndërshtetërore Variantin të cilin e kemi përzgjedh është varianti me tunelin më të gjatë me 6.4 km. Arsyeja ka qenë që kjo rrugë të mund të funksionojë edhe në kushte të vështira të dimrit kur ka reshje të mëdha të borës. Pra, kemi shku me variantin me tunelin më të gjatë por në lartësi mbidetare shumë më të ulët. Dalja në territorin e Kosovës është në fshatin Manastiricë”.

Ndërsa Kryetari i Komunës së Tetovës, Billall Kasami, i bëri thirje qeverisë që sa më shpejt ta përfundojë këtë projekt.

“Sot këtu jemi që të promovojmë edhe një aks të rëndësishëm të këtij segmenti që parasëgjithash do të jetë lidhja e dy qyteteve por në drejtim të zhvillimit të turizmit. Ajo që është me rëndësi për tu theksuar, që mes dy shteteve ka një studim fizibiliteti për aksin rrugor Tetovë-Prizren i cili studim fizibiliteti duhet të realizohet mes dy qeverive por ne si pushtet lokal nuk do të rrimë duarkryq, ne do ta bëjmë punën tonë dhe do të kontribuojmë zhvillimin e kësaj pjese të malësisë së Sharrit”.

Bilall Kasami tha me këtë rast se nëse qeveria e Maqedonisë Veriut nuk e ka ndërmend që ta bëjë këtë rrugë, ata nuk do të rrinë duarkryq, por ashtu siç e bënë këtë segmend rruge do ta bëjnë edhe pjesën tjetër.

Para Tetovës, Kryeministri i Kosovës vizioti Shkupin ku qindra gra, burra, pleq e fëmijë, kishin dalë në rrugë dhe me padurim prisnin arritjen e Albin Kurti në Komunën Çair, në përurimin e rrugës me emrin e veprimtarit Adem Demaçi.

Kryeministri i Kosovës foli për veprat dhe figurën e Adem Demaçit, ndërsa shprehi mirënjohje për vendimim që kjo rrugë të mbartë emrin patriotit Demaçi.

“Sa herë që një rrugë, një shesh a një shkollë emërtohet me emrin e një personi që ka ndërruar jetë, natyrshëm të vjen të pyesësh se çfarë do të mendonte për këtë ai person po të ishte gjallë. Kjo është gati e pamundur ta dish, por ajo çfarë mund të thuhet me bindje është se duke emërtuar këtë rrugë, këtu në Çair, në Shkup, me emrin Adem Demaçi po shenjohet me kuptimet e saj më të kulluara politike, historike dhe njerëzori,” tha Albin Kurti ndërsa për arsyen se përse pikërisht këtë rrugë kishin vendosur ta emërojnë kështu, e tregoi kryetari i komunës së Çairit, Visar Ganiu.

“Këtu prapa meje, në këtë ndërtesë Adem Demaçi, 30 vite më parë qëndroi tek familja Toska, menjëherë pas mbajtjes së grevës së urisë, së bashku me një grup gazetarësh dhe intelektualësh të Kosovës e kishin mbajtur për të mbrojtur fjalën e lirë, pas veprimeve që ndërmerrte politika e Millosheviqit, për të heshtur lirinë e fjalës në Kosovë, duke i mbyllur të gjitha mediat në gjuhën shqipe. Gjatë qëndrimit të tij në Shkup, kjo ishte rruga e rij e preferuar, në të cilën shetiste”.

E pranishme në këtë ngjarje ishte edhe mbesa e Adem Demaçit, Fitore Shahini, e cila tregoi se nga fëmijëra e saj, dajën e mban mend vetëm nëpër burgje.

“Që nga mosha 5 vjeçare mbaj mend vetëm burgje. Burgu I dytë I dajës tim ka qenë kur isha unë vetëm 5 vjeçare, tërë kohën kam jetuar duke menduar kohën se kur daja im do të lërohet nga burgu, kujt do të kem kujt ti them dajë”.

Ndryshe, kjo rrugë që tashmë mbanë emrin “Adem Demaçi” është quajtur “Brigada e dytë Maqedonase”.