Në tremujorin e dytë, Eurostat: Ngadalësohet transporti nga ajri

Lëvizja e shtetasve shqiptarë dhe të huaj përmes ajrit është ngadalësuar ndjeshëm në tremujorin e dytë të këtij viti.

Sipas të dhënave të publikuara nga Eurostat, në tremujorin e dytë 2025, kanë udhëtuar me linja ajrore 3.052.511 pasagjerë nga 2.879.158 pasagjerë që kanë udhëtuar në të njëjtën periudhë të vitit të kaluar, duke u rritur me 6.0 për qind.
Kjo rritje është shumë më e ngadaltë në krahasim me të njëjtën periudhë të një viti më parë, kur INSTAT raportonte se në tremujorin e dytë 2024, kanë udhëtuar me linja ajrore 2.879.158 pasagjerë nga 1.747.887 pasagjerë që kanë udhëtuar në të njëjtën periudhë të vitit të kaluar, duke u rritur me 64.7 për qind.
Sipas INSTAT, në transportin ajror gjatë tremujorit të dytë 2025 kanë operuar 29 shoqëri ajrore, nga këto 28 janë shoqëri të huaja dhe 1 shoqëri shqiptare. Në hapësirën ajrore shqiptare kanë fluturuar 110.073 avionë, nga të cilët 83.2 për qind të tyre e zë numri i mbikalimeve.
Volumi i mallrave, duke përfshirë postën, të hyrë dhe të dalë nëpërmjet transportit ajror rezultoi 798,6 ton, nga të cilat 67,5% janë mallra të hyrë dhe 32,5% janë mallra të dalë.
Krahasuar me tremujorin e dytë 2024, volumi i mallrave paraqitet me rritje 42.4 për qind.
Volumi i mallrave të tregtuara, eksport dhe import, me ajër në tremujorin e dytë 2025 është 583 ton.
Krahasuar me të njëjtën periudhë të vitit 2024, ky tregues është rritur me 2.3 për qind. Volumi i
mallrave të importuara me ajër në tremujorin e dytë 2025 zë 0,02% ndaj volumit gjithsej të mallrave të importuara.

Rritje 10% e pasagjerëve në porte
Ndryshe nga lëvizjet përmes ajrit, lëvizjet përmes porteve janë përmirësuar. Numri i pasagjerëve që kanë udhëtuar nëpërmjet porteve detare në vend është 330.630 persona, me rritje prej 10.9 për qind me bazë vjetore.
Sipas INSTAT, Porti i Sarandës është porti nga i cili kanë udhëtuar 54.0 për qind e pasagjerëve, ndjekur nga porti i Durrësit me 40.3 për qind dhe më pas porti i Vlorës me 5.7 për qind. Ndryshe nga ajri transporti përmes detit është përshpejtuar teksa në të njëjtën periudhë të një viti më parë rritja kishte qenë 6.1 për qind.
Në Shqipëri operojnë katër porte detare të cilët shërbejnë për transport mallrash: Porti i Durrësit, Vlorës, Shëngjinit dhe porti i Limjonit Sarandë). Porti i Durrësit është porti kryesor në vend prej të cilit, gjatë tremujorit të dytë 2025, janë transportuar 93.6 për qind e volumit të mallrave të transportuar me det, ose 2.063 mijë ton mallra.
Volumi gjithsej i mallrave të transportuara nga porti i Durrësit është rritur me 1.4 për qind, krahasuar me të njëjtën periudhë të një viti më parë.
Numri i anijeve të hyra dhe të dala nga portet në vend rezulton 276 anije, nga këto 253 anije janë të huaja dhe 23 anije vendase. Numri i anijeve të hyra dhe të dala në porte është rritur me 10.0 për qind, ku numri anijeve të huaja është rritur me 16.1 për qind, krahasuar me tremujorin e dytë 2024.
Portet detare ku kryhet transporti pasagjerëve në vend janë: Porti i Durrësit, Vlorës, Sarandës dhe porti i Shëngjinit. Lëvizja e pasagjerëve në tremujorin e dytë 2025 është kryer nga porti i Durrësit, Vlorës dhe porti i Sarandës./Monitor/