Ngërçi institucional, Kurti: Kosova duhet të shkojë në zgjedhje!

Ngërçi institucional shfaqet vetëm kur përjashton zgjedhjet, thekson Kryeministri në detyrë i Kosovës ndërsa ishte akuzuar rëndë nga Presidenti Hashim Thaçi se ka uzurpuar zyrën e Kryeministrit.

“Sot u bënë dy muaj nga mocioni i mosbesimit. Më 25 mars krizës shëndetësore iu pat shtuar edhe ajo politike. Mirëpo, ne po ia dalim. Dje ishte dita e parë, që nga 13 marsi, pa të infektuar me virusin Corona,” shprehet Kryeministri i Kosovës në reagimin e tij përmes rrjetit social Facebook duke shtuar:

“Ngërç institucional? Nuk është e vërtetë. Mospajtime ka, por edhe zgjidhje ka. Në përputhje me Kushtetutën tonë nevojiten zgjedhje të reja.”

Zgjedhjet tashmë po mbahen anembanë Evropës, thekson Albin Kurti, dhe pas shëndetit të popullsisë dhe ekonomisë, është në pyetje edhe shëndeti i demokracisë.

“Zgjedhje do të ketë në qershor në Islandë, Francë dhe Serbi, kurse në korrik në Maqedoninë e Veriut, Spanjë dhe Kroaci,” thekson Kryeministri i Kosovës, Albin Kurti duke përfunduar:

“Duhet të kemi zgjedhje edhe në Kosovë e aso lokale në Podujevë. Madje, mundet edhe njëkohësisht.”