Ngriti flamurin kombëtar në KKSH, Serbia padi kundër Kryetarit Ragmi Mustafa
Kryetari i Këshillit Kombëtar Shqiptar, Ragmi Mustafa, është ftuar nga gjykata e Vranjës, pasi kundër tij është ngritur padi për ngritjen e flamurit kombëtar shqiptar, në selinë e KKSH më 28 nëntor 2020.
“Dje, pranova ftesën e radhës nga gjykata e Vranjës, për ngritjen e flamurit kombëtar shqiptar, në selinë e Këshillit Kombëtar Shqiptar, më 28 nëntor 2020.Si herave të tjera, akuzohem për kryerjen e veprës për kundërvajtje, ngritja e flamurit kombëtar,” thekson Ragmi Mustafa në reagimin e tij përmes rrjetit social Facebook duke sqaruar se kjo padi u ngrit pasi ai apeloi në Gjykatën e Apelit vendimn e Gjykatës së Lartë për padinë e tij ndaj Ministrit të Punëve të Brendshme të Republikës së Serbisë, Aleksandër Vulin, për përdorim të gjuhës përçmuese, fyese, gjuhës së urrejtjes, gjuhës kriminale e denigruese ndaj shqiptarëve.
Duke ftuar Bashkimin Evropian, Shtetet e Bashkuara dhe Organizatën për Siguri e Bashkëpunim Evropian që mos t’i mbyllin sytë ndaj pushtetit autoritar dhe anti-minoritar në Beograd, Kryetari i Këshillit Kombëtar Shqiptar në Luginën e Preshevës, Ragmi Mustafa, shpreson në reagimin e Tiranës dhe Prishtinës zyrtare:
“Uroj që Prishtina dhe Tirana zyrtare të jenë më dinamike në sensibilizimin e qarqeve diplomatike ndërkombëtare ndaj presioneve dhe diskriminimit të shqiptarëve në Serbi. Duke mos u zbrapsur politikisht, Këshilli Kombëtar Shqiptar do ta vazhdojë betejën ligjore, deri në Gjykatën Evropiane për të drejtat e njeriut në Strasburg.”
Ndryshe, presionet politike dhe ligjore të pushtetit në Beograd ndaj shqiptarëve në Serbi, e në Luginën e Preshevës po rriten çdo ditë e më shumë. Ndërkohë Aktvendimi i fundit i Gjykatës së Lartë që legalizoi institucionalizimin e gjuhës së urrejtjes ndaj shqiptarëve, si dhe përndjekjet ligjore që pasuan pas padisë së Kryetarit të KKSH, Ragmi Mustafa kundër Ministrit të Brendshëm të Serbisë, Aleksandar Vulin, dëshmojnë motivet politike të sistemit gjyqësor e prokurorial në Serbi.
