Nis Asambleja Parlamentare e Këshillit të Evropës, diskutohet anëtarësimi i Kosovës në KiE

Debati rreth kërkesës së Kosovës për anëtarësim në Këshillin e Evropës dhe votimi i rekomandimit do të jetë ndër pikat më të rëndësishme të sesionit pranveror të Asamblesë Parlamentare të Këshillit të Evropës që fillon sot në Strasburg dhe zhvillohet deri më 19 prill.

Komiteti Politik i Asamblesë Parlamentare të Këshillit të Evropës më 27 mars e ka miratuar Rekomandimin për kërkesën e Kosovës për anëtarësim në KiE, për të cilën ky organ do të deklarohet nesër më 16 Prill, në seancë plenare.

Çështjet tjera që pritet të diskutohen në këtë sesion pranveror do jenë, shqyrtimi i respektimit të detyrimeve të Shqipërisë me propozimin që të ndërpritet monitorimi i plotë i këtij shteti anëtar; Diskutimi për vdekjen e Aleksei Navalny dhe nevoja për përballjen me regjimin totalitar të Vladimir Putinit, dhe luftës së tij kundër demokracisë, me ndërhyrjen e bashkëshortes së të ndjerit Julia Navalny; Ndalimi arbitrar i Vladimir Kara Murze dhe përndjekja sistematike e demontruesve kundër luftës në Rusi dhe Bjelorusi; Mbështetja për rindërtimin e Ukrainës duke përfshirë dhe propozimin që pasuria e ngrirë shtetërore ruse të përdoret për këtë qëllim, me pjesëmarrjen e kryetarit të parlamentit ukrainas, Ruslan Stefançuka; Mbrojtja e fëmijëve nga dhuna në internet; Marrëdhënia e shumicës dhe opozitës në një shtet demokratik, dhe praktika e mirë në referendume; Dhe, roli i Këshillit të Evropës në parandalimin e katastrof humanitare, thuhet në njoftim.

Ndërkohë është kërkuar dhe një diskutim urgjent në lidhje me draftin e Konventës kornizë për inteligjencën artificiale, të drejtat e njeriut, demokracinë dhe sundimin e ligjit.