Nis kolaudimi i makinave, afat i ri për mjetet që u skadon kontrolli teknik!

Rinis kolaudimi i automjeteve pas katër muaj pezullim shërbimi. Por atyre që iu skadon certifikata e kontrollit teknik të mjeteve nuk kanë përse të shqetësohen. Procesi nuk do të hapet me ta. Për më tepër, me ndryshimet që ka pësuar Kodi Rrugor, vlefshmëria e kontrollit të kryer vitin e shkuar, praktikisht shtyhet edhe me një vit tjetër. Këtë e sqaron drejtori i DPSHTRR, Blendi Gonxhe, përmes një shembulli konkret.

“Nëse vlefshmëria e certifikatës së një mjeti skadon në datën 1 qershor 2021, nuk kanë përse të paraqiten për kolaudim në atë datë, por në 1 qershorin e vitit 2022. Për qarkullimin do të njoftohen organet e Policisë dhe ndërkaq del edhe udhëzimi përkatës”. Ky është skenari i parë me miratimin nga Presidenti të ndryshimeve në Kodin Rrugor. Një mosdekretim nga ana e kreut të shtetit, Ilir Meta, është skenari i errët i cili zgjat edhe më në kohë procesin, duke bërë që ligji t’i nënshtrohet edhe një herë shqyrtimit në Kuvend.

Kolaudimi

Për të shmangur radhët në subjektet e kontrollit teknik janë përcaktuar një kategori automjetesh që e kanë emergjencë futjen në lupën e kontrollit teknik. Bëhet fjalë për mjetet që u kthyen mbrapsht vitin që shkoi, ato që hynë në Shqipëri gjatë kohës që kolaudimi nuk funksiononte si shërbim, si dhe një sërë mjetesh në funksion komunitar. “Shërbimi do të nisë së pari me mjetet që janë refuzuar në kolaudim vjet, pra ata pa certifikata të vlefshme dhe që s’kanë përfituar as shtyrje afati, as zgjatje afati. Pastaj kemi mjetet me kilometra të regjistruara pas datës 31 dhjetor 2020 që do t’i nënshtrohen kolaudimit për herë të parë.

Përveç tyre janë dhe mjetet taksi, autoshkolla, ato që shërbejnë për transport udhëtarësh e ambulanca që u është bërë 12- mujorshi, 6+6. Pra, kanë kapur afatet e normave të reja të ndryshuara. E kështu gradualisht do të ecim”, sqaron Blendi Gonxhe. Kategoritë e automjeteve të sipërcituara përllogariten të jenë diku rreth 150 mijë të tilla. Me hapjen e shërbimit të kolaudimit, ata nuk mund të paraqiten kur të duan, por me të marrë njoftimin. Kjo është faza emergjente, që fut në shina procesin e kolaudimit, tashmë si shërbim shtetëror. “Pastaj është faza e dytë.

Mjetet përfituese të rregullave të reja do të njoftohen në sistem përmes ‘e-Albania’ apo në rrugë të tjera për skadencën e tyre”, shton drejtori. Ndërkohë që pritet botimi në Fletoren Zyrtare, një udhëzim me detajet e procesit të kolaudimit është drejt përfundimit për t’u publikuar ditët në vijim.

Ndryshe, DPSHTRR fillimisht kishte njoftuar se në zbatim të Aktit normativ Nr. 36, datë 23.12.2020 të Këshillit të Ministrave “Për zgjatjen e afatit të vlefshmërisë së certifikatës së kontrollit teknik”, me kryerjen e pagesës së Taksës Vjetore të Mjeteve të Përdorura (TVMP), vlefshmëria e certifikatës suaj aktuale të kontrollit teknik zgjatet edhe me 3(tre) muaj nga data e përfundimit të vlefshmërisë së saj. Ky dokument është i vlefshëm për t’iu paraqitur organeve të kontrollit të mjeteve dhe rimorkioneve të tyre në rrugë.