Nis ndërtimi i nënstacionit policor dy kilometra larg kufirit me Serbinë

Kryeministri i Kosovës, Albin Kurti, bashkë me ministrin e Punëve të Brendshme, Xhelal Sveçla e drejtorin e Policisë së Kosovës, Gazmend Hoxha kanë vendosur sot në mëngjes gurëthemelin e nënstacionit policor në fshatin Izvor të Komunës së Zveçanit.

Lajmin e ka bërë të ditur vetë Kryeministri Kurti duke shprehur bindjen se objekti ku do të shërbejë policia kufitare do të ndërtohet shumë shpejt.

“Të premten e javës së kaluar u vendos gurthemeli i nënstacionit policor tek Ura e Lumit Bistricë. Sot, në mëngjes, bashkë me ministrin e Punëve të Brendshme, Xhelal Sveçla dhe Drejtorin e Policisë, Gazmend Hoxha, vendosëm gurthemelin e nënstacionit policor në fshatin Izvor të Komunës së Zveçanit, dy kilometra larg kufirit me Serbinë,”

“Në objektin e ri, që presim të ndërtohet shumë shpejt, do të shërbejë policia kufitare.”

Ndërkohë ministri i Brendshë, Xhelal Sveçla, u shpreh i bindur se po vazhdon të përmirësohet infrastruktura e Policise së Kosovës, dhe të ngritet niveli i sigurisë në gjithë Republikën.

Ndryshe, nënstacionit policor që pritet të ndërtohet në fshatin Izvor të Komunës së Zveçanit, është vetëm dy kilometra larg kufirit me Serbinë. Vlera e këtij projekti është rreth 700 mijë euro.