Nis sot sesioni i Parlamentit të Edi Ramës
Sot, me fillim në orën 10:00, deputetët e dalë nga zgjedhjet e 11 Majit do të betohen në Parlamentin i cili u pa qartë dje në Asamblenë e Partisë Socialiste se do të drejtohet nga Kryeministri Edi Rama.
Pasi Edi Rama caktoi numrin e Komisioneve, drejtimin e tyre, Kryetarin e Parlamentit dhe Nënkryetarin, sot 140 deputetë do të konfirmojnë këtë ferman të Kryeministrit të cilit i mungoi vetëm deputeti më i vjetër që do të drejtoi seancën.
Me refuzimin e deputetit më të vjetër, Sali Berisha, për të drejtuar seancën, atë që nuk e tha në Asamble e vendosi më vonë, dhe do të jetë Vasil Llajo ai që do të drejtoi seancën.
Deputeti Llajo do të çelë seancën konstituuese dhe do të ngrihet një komision për verifikimin e mandateve. Pas shqyrtimit të dosjeve të deputetëve të sjella nga Komisioni Qendror i Zgjedhjeve, proces ky me natyrë burokratike. Derisa komisioni të bëjë punën e tij, deputetët e rinj do të largohen dhe do të rikthehen pasdite.
Në pjesën e dytë të seancës plenare, drejtuesi Llajo do të thërrasë një nga një emrat e 140 deputetëve për t’u betuar. Më pas, mazhoranca socialiste do të propozojë emrin për Kryetar të Parlamentit, propozim i cili dje u bë i ditur se ishte vendim i Edi Ramës dhe është Niko Peleshi.
Parlamenti do të organizojë një votim të fshehtë me fletë votimi letre dhe kuti, ku votat do të numërohen një nga një.
Pasi Komisioni do të shpallë kryetarin e zgjedhur të Parlamentit të Edi Ramës, Llajo do t’i lirojë vendin drejtuesit të vërtetë të Parlamentit, i cili do të mbajë fjalën zyrtare.
E veçanta e këtij Parlamenti do të jetë dhe fakti se pjesë e drejtimit të tij nuk do të jetë asnjë deputet nga mrekullia politike shqiptare, Foltorja!
Nënkryetar të Parlamentit të Edi Ramës do të jenë dy kundërshtarët e devotshëm të Edi Ramës, Klodiana Spahiu dhe Agron Gjekmarkaj ashtu si dhe Kryetarët e Grupeve Parlamentare PS e PD: Taulant Balla dhe Gazment Bardha!
Në një seancë tjetër, që parashikohet të jetë të hënën, Kryeministri Edi Rama do t’i parashtrojë Kuvendit qeverinë e tij dhe programin qeverisës. Vetëm pasi parlamenti të votëbesojë kabinetin, ministrat e qeverisë “Rama 4” do të shkojnë për dekretim dhe betim tek Presidenti i Republikës, Bajram Begaj.
