Nis viti i ri shkollor, Rama: Një vit të mbarë; Për Zahon: Dita e parë emocion i rrallë!
Kryeministri Edi Rama mëngjesin e sotëm të nisjes së vitit të ri shkollor e filloi me një urim për të gjithë nxënësit dhe mësuesit, por në familjen e tij kishte dhe një emocion të veçantë:
“Mirëngjes! Duke ju uruar nxënësve e mësuesve një vit të mbarë shkollor, pikësëpari me shëndet dhe patjetër edhe me rezultate sa më të mira.”
Por, 14 Shtatori 2020 është dita e parë në shkollë edhe e t’birit të Kryeministrit, Zahos, ku Edi Rama nuk fsheh emocionet:
“Dita e parë emocion i rrallë. Zoti i bekoftë të gjithë fëmijët që sot nisën shkollën dhe i mbroftë gjithnjë bashkë me prindërit e gjyshërit e tyre të pazëvendësueshëm. Dashuri, shëndet e gëzime paçin gjithmonë,” thekson Kryeministri Edi Rama në urimin për të birin Zaho dhe gjithë fëjët që sot nisën vitin e ri shkollor.
Ndryshe, sot 480 mijë nxënës dhe 30 mijë mësues nisën vitin e ri shkollor 2020-2021 me një protokoll të veçantë sigurie në mënyrë që të minimizohet përhapja e COVID-19.
