Një ditë para zgjedhjeve për Kryetarin e PD, Gjana: Miratohet lista paraprake, nesër Qendrat hapen në orën 08:00 me ose pa komisionerë të kandidatëve

Një ditë para zgjedhjeve për Kryetarin e ri të Partisë Demokratike, Kryetari i Komisionit të Zgjedhjeve, Jemin Gjana, bëri të ditur se është miratuar lista paraprake e komisionerëve ndërsa vazhdon procesi për shpërndarjen e materialeve zgjedhore në të gjitha degët e PD.

“Sapo përfunduam një nga mbledhjet e Komisionit. Miratuam listën, jo përfundimtare, pasi nuk janë përfaqësues për të gjita komisionet. Kandidati Kadilli ka sjellë përfaqësuesit e tij nga 76 në 54 komisione. E miratuam këtë listë pasi bëmë verifikimet. Qendrat do të duhet të jenë të hapura në orën 8 ditën e nesërme. Nëse do të ketë raste që do të mungojnë, apo do të dërgojnë lista me emra që nuk janë anëtarë të PD, kjo s’do të thotë se qendrat nuk hapen,” sqaroi Jemi Gjana duke shtuar se procesi i shpërndarjes së materialit zgjedhor përfundon në drekë.

“Janë nisur në të gjitha qarqet materiali zgjedhor. Listat e votuesve që janë shkarkuar nga sistemi, po shpërndahen të gjitha. Në fund është lënë Tirana. Procesi përfundon i gjithi deri në drekë.”

Ndryshe, nesër më 13 Qershor, 75.067 anëtarë të Partisë Demokratike në 76 qendra votimi, do të votojnë për Kryetarin e r i të PD.