Një ditë pas tërmetit/ 600 banorë pa shtëpi dhe 1600 banesa të tjera të dëmtuara
Nata e shkuar ka qenë e qetë nga këndvështrimi sizmologjik për qytezat siçiliane pranë vullkanit Etna. Janë regjistruar rreth 10 lëkundje tërmeti, por në shkallë të ulët.
Por ka qenë dhe një natë e ftohtë dhe shqetësuese për banorët të cilët kanë kaluar natën jashtë banesave të tyre, duke fjetur në makina nga paniku i një nate më parë.
Janë rreth 600 banorë të mbetur pa banesa pasi tërmeti i natës së 26 dhjetorit i ktheu në rrënoja e rreth 1600 banesa të tjera janë të dëmtuara pjesërisht, raporton OraNews.
Mjaft prej banorëve janë të zemëruar e akuzojnë autoritetet për mungesën e masave paraprake e alarmit informues.
“Toka kishte ditë që dridhej e asnjë bashki apo ekspert i vullkanologjisë nuk informoi banorët për rrezikun që mund të shfaqej”, denoncojnë ata.
Ekspertët janë të bindur se tërmeti 4.8 ballë i orës 3.19 të mëngjesit të 26 dhjetorit është shkaktuar nga aktivizimi i Etnës dhe është një nga tërmetet më energjikë të regjistruar më parë pranë vullkanit.
Mbi 1000 lëkundje sizmike janë regjistruar në 3 ditët e fundit e hiri dhe llava vullkanike ka mbërthyer horizontin e qytezave siçiliane.
“Italia konfirmohet dhe një herë tjetër një territor veçanërisht i prekshëm nga rreziqet gjeofizike,” është alarmi i lëshuar nga Kryetari i Këshillit Kombëtar të Gjeologëve, Francesco Peduto.
“Në tërmetin e fundit është kombinuar rreziku sizmik me atë vullkanologjik”.
Gjatë ditës së sotme, këshilli i rajonit të Siçilisë pritet të shpallë gjendjen e jashtëzakonshme për fatkeqësi natyrore.
E po sot, dy zëvendëskryeministrat e qeverisë Matteo Slavini dhe Luigi Di Maio po vizitojnë zonat e dëmtuara nga tërmeti.
“Nuk duhet të na harroni. Për fat këtu nuk pati viktima, por ishim mjaft pranë vdekjes”, janë shprehur banorët gjatë takimit mëngjesin e sotëm me zëvendëskryeministrin Di Maio.
“Ju jeni në qeveri pasi ne ju kemi votuar, siçilianët ju kanë votuar e bënë ç’është e mundur që 5 Yjet të fitojnë zgjedhjet në territorin tonë, e ju nuk duhet të na harroni. Duhet të na ndihmoni.”
Ndërkohë Federata Italiane e Hoteleve ka nënshkuar marrëveshjen për të mirëpritur në strukturat e tyre turistike banorët e shtëpive të shkatërruara nga tërmeti
