Një muaj të bllokuar dhe pa shtet, Flamur Hoxha nga Kukësi: Kjo është Shqipëria e rilindjes!

Prej një muaji tre fshatra të Kukësit janë të bllokuara nga rrëshkitjet e dherave për shkak të reshjeve të dendura. Në takim me Drejtuesin Politik të PD pë Qarkun Kukës, Flamur Hoxha, banorët shprehen se shteti nuk ka investuar dhe nuk ka dërguar fadromat për të hapur qarkullimin e mjeteve.

Ata akuzojnë kryetarin e Bashkisë Kukës, që fokusohet vetëm në disa komuna, duke lënë zonën të braktisur.

“Nga bllokimi i rrugës fëmijët prej 4 javësh nuk shkojnë në shkollë, nuk ka as infermier për të bërë qoftë edhe një gjilpërë, çdo ditë e më shumë fshati po braktiset,” tha një banor ku përveç izolimit, situata sa vjen e rëndohet edhe për shkak të kushteve të rënda të jetës, ku u mungojnë uji dhe dritat.

“Rrugë jo, investim jo, shëndetësi dhe arsim këtu nuk ka. Detyra jonë është ta bëjmë faktike, se si është gjendja. Pastaj le të dalë përfaqësuesi i rilindjes apo kryeministri, le të thotë nëse ne po themi diçka që nuk është. Ju s’keni rrugë. Ekonomia juaj është në mjerim,” tha Flamur Hoxha nga fshati Gdhesht në Kukës duke përfunduar:

“Tre fshatra të bllokuara. Modeli i tyre janë projektet 3D me kulla dhe më rrugë, dhe sipas tyre kjo është Shqipëria e rilindjes”