Një pacient i vdekur, pesë të lënduar nga një zjarr në QKUK

Një person ka ndërruar jetë si pasojë e plagëve të marra nga zjarri që ka rënë në Shërbimin Emergjent në Klinikën e Psikiatrisë në QKUK ndërkohë raportohet për pesë persona që kanë pësuar lëndime trupore nga ky zjarr. Zjarri ka rënë në njërën nga dhomat e Shërbimit Emergjent të kësaj Klinike, derisa shkaqet e zjarrit akoma nuk janë bërë të ditura.

SHSKUK ka njoftuar se në të njëjtin repart, dyshohet se një pacient i ka vënë zjarrin dhomës së tipit të mbyllur dhe për shkak të tymit ka vdekur.

“Qendra Klinike Universitare e Kosovës, QKUK, njofton se mbrëmë rreth orës 23:00, në Repartin e Urgjencës dhe Intensives Psikiatrike ka ndodhur një zjarr, në njërën nga dhomat e tipit të mbyllur, ku qëndrojnë pacientët përkohësisht, pacientë në gjendje të agresivitetit dhe agjitimit të theksuar psikomotor, jo koshient për gjendjen mendore.

Në të njëjtin Repart, në të njëjtën kohë, dyshohet se një pacient i ka vënë zjarrin në rrethana të panjohura dhomës së tipit të mbyllur, me ç’rast si pasojë e asfiksionit nga tymi ai ka humbur jetën, përkundër përpjekjeve maksimale të stafit shëndetësor për ta shpëtuar pacientin.

Gjithashtu gjatë kësaj kohe, një paciente tjetër ka pësuar shenja të helmimit nga tymi, e poashtu e tërë ekipi kujdestare, dy mjekë dhe dy infermiere të cilët gjatë ofrimit të ndihmës për pacientin në fjalë dhe evakuimit të pacientëve të tjerë, kanë manifestuar shenja të helmimit nga tymi dhe kanë marrë ndihmë mjekësore në Klinikën Emergjente”, ka njoftuar SHSKUK.

Rasti është duke u hetuar nga njësitet përkatëse të Policisë së Kosovës.