Një politikan serb hedh ngjyrë në muralin e Mlladiçit
Në Serbi ka vazhduar edhe sot shprehja e pakënaqësisë me vendosjen e një murali me imazhin e Ratko Mlladiçit, ish-komandant i ushtrisë serbe në Bosnje e Hercegovinë, i dënuar për gjenocid në Srebrenicë.
Gjorgjo Zujoviç, një zyrtar i Partisë Socialdemokrate të Serbisë, hodhi ngjyrë në muralin e vendosur në një rrugë qëndrore të Beogradit.
Dje, Ministria e Punëve të Brendshme e Serbisë ndaloi një tubim të organizatës Nisma e Rinisë për të Drejtat e Njeriut në Serbi, e cila donte të shlyente muralin e Mlladiçit. Më pas, RFE raporton se një numër i lartë i policëve qëndroi në pjesën e qytetit ku ndodhet murali.
Aktivistja për të drejtat e njeriut në Serbi, Aida Qoroviq, u ndalua dje nga policia në Beograd, pasi hodhi vezë në mural.
Sot policia nuk ishte e pranishme në këtë lokacion.
Përmes një letre të hapur, Organizata Joqeveritare “Nisma Rinore për të Drejtat e Njeriut në Serbi” (YIHR) tha më herët se nuk do të bëjë më përpjekje për të hequr muralin e Ratko Mlladiçit në qendër të Beogradit, siç ishte planifikuar.
Kjo organizatë tha se ka hequr dorë, pasi e kuptoi mirë deklaratën e Ministrisë së Punëve të Brendshme dhe ministrit, Aleksandar Vullin, në të cilën flitet për “fotografi të kokave të gjakosura serbe” nëse hidhet ngjyrë në muralin e Mlladiqit.
“Formacionet e tij paraushtarake, siç është (organizata ultra e djathtë) Leviatan, do të na thyenin kokat dhe policia e tij nuk do të na mbronte”, tha organizata.
Të martën, policia nuk i lejoi aktivistët t’i afroheshin muralit derisa një grup i mbështetësve të Mlladiqit u mblodhën në të njëjtin vend duke brohoritur mesazhe mbështetjeje për të.
Ministria e Brendshme tha se policia ka ruajtur rendin dhe qetësinë publike në Beograd.
Gjatë ditës, RFE raporton se policia arrestoi gjashtë persona “për prishje të rendit dhe qetësisë publike në zonën e tubimeve të paligjshme publike”.
Në deklaratë thuhet se policia nuk e mbron muralin, por “rendin dhe qetësinë publike nga të gjithë ata që duan ta rrezikojnë atë, pavarësisht nëse janë pro heqjes së muralit apo e kundërshtojnë atë”.
Ndryshe, si komandant i ushtrisë serbe në Bosnje e Hercegovinë, Mlladiç është dënuar për gjenocid në Srebrenicë, persekutim, krime kundër njerëzimit, shfarosje dhe krime të tjera lufte, të kryera gjatë luftës në Bosnje, nga viti 1992 deri më 1995.
