Njeriu pa pasqyrë, Rama: Sot shqiptarët s’kanë alternativë më të mirë se sa mua!

Shqiptarët nuk e kanë sot një alternativë më të mirë se sa mua! Kështu u shprehë sot Kryeministri Edi Rama me nisjen e sezonit të ri politikë dhe hapjen e fushatës elektorale për zgjedhjet parlamentare të vitit 2021, duke dëshmuar që jo vetëm nuk sheh lajme dhe nuk njeh realitetin shqiptar, por ai nuk sheh as veten në pasqyrë. Ndryshe, kur nisi nga vetja, sot para Grupit Parlamentar, më e pakta do të vjellte kur foli për shqiptarët, mirëqenien dhe suksesin 7 vjeçar të qeverisë që drejton.

Por meqë tani nuk njeh as veten, sot Kryetari i PS shprehu ambicien për mandatin e tretë pasi nuk sheh as kundërshtarë politik përveç disave të “padukshëm” që tha se i ka brenda partisë.

“Po nisim sezonin e fundit të këtij mandati të vështirë dhe sfidues për të gjithë ne. Sezonin e sapokaluar na u desh të përballemi me tërmetin shkatërrues dhe me pandeminë globale që vazhdon, a thua se s’na dilnin e s’na tepronin vështirësitë tona në kthesën e vështirë ku është futur Shqipëria. Tërmeti dhe pandemia nuk janë ngjarje dosido, por janë ngjarje që tundin tokën e një vendi të tërë dhe jo më të një qeverie. Në fakt qeveria jonë ka bërë një punë të jashtëzakonshme për të përballuar pasojat e këtyre dy ngjarjeve.

Sot jemi mbledhur që t’iu ftoj në një reflektim të thellë, por të shpejtë, që sot dua ta nisim për ta kryer në javët e ardhshme bashkarisht, secili individualisht dhe në grupe të vogla, një reflektim se si do ta vazhdojmë përpjekjen tonë në vijim dhe si do ta kurorëzojmë këtë mandat me bindjen për të merituar një mandat të tretë.

Po nis nga vetja: çfarë duhet të bëj unë më shumë dhe më mirë në këtë sezon për të merituar respektin e atyre që më besuan drejtimin e Shqipërisë. A jam unë kryeministri më i mirë që mund të jem për shqiptarët? Po ju a jeni deputetët më të mirë që ata mund të kenë? A është kjo që kemi bërë deri më sot më e mira që ne mund të bëjmë për ta? Shqiptarët nuk e kanë sot një alternativë më të mirë se sa mua dhe se ju, që na vunë në krye të vendit. Këtë ata e dinë. Shumica e tyre nuk e diskuton, por kjo sot s’më mjafton fare dhe atyre jo e jo që nuk ju mjafton,” tha Kryeministri Edi Rama duke shprehur ambiciet për mandatin e tretë:

“E pyes veten shpesh: Po PS, që sot përfaqësohet nga ne, mund të bëjë në krye të vendit më shumë se kaq? Përgjigjja ime është pa asnjë dyshim “Po”. Kam bindjen dhe besimin se mund të bëj akoma më shumë, ndryshe nuk do të kisha bindjen për të vijuar më tej. Unë jam i gatshëm t’ua provoj shqiptarëve se kam dëshirën, ambicien, vullnetin për të bërë më shumë për ta.”

…arra nëpër gojë…

Pas vendosi drejtuesit politik të qarqeve, kryeministri Rama dha mesazhe të qarta për socialistët por të pakuptueshme për shqiptarët

“S’do them asnjë fjalë për kundërshtarët, ata janë humbës kronikë që më mirë se çdo gjë tjetër dinë të gjejnë rrugën e humbjes. Ata janë një fatkeqësi jo thjesht për veten por edhe për ne. Nuk na stimulojnë të përmirësohemi, nuk stimulojnë opinionin publik të mprehë këndvështrimin për ne.

Ne duhet të shohim sa më shumë tek kundërshtarët e padukshëm, tek disa që humbin durimin brenda familjes sonë të madhe, brenda territorit që mbulon gjithë PS për t’i arritur, prekur, kuptuar siç duhet këto ndjesi. Duhet të shohim jo jashtë por brenda, jo rrotull njëri tjetrit por brenda. Kam marrë fjalën e një udhëheqësi të madh kur thotë: Ne këtu paria e PS duhet të pyesim veten se çfarë unë duhet të bëj brenda PS, jo çfarë PS do bëjë për mua. S’ka kohë të rrotullojmë arra nëpër gojë. Çfarë mund të kërkoni më ju nga PS që të jeni gati t’i bëni hyzmet çdokujt që ju ka bërë nder, të jeni përfaqësues në tempullin e demokracisë,” tha Edi Rama duke përfunduar:

“Çfarë mund të kërkoni tjetër ju, për t’iu përgjigjur njerëzve që kanë nevojë t’ua qani hallin edhe kur nuk ua zgjidhni. Cfarë mund të kërkoni pas 7 vitesh apo disa prej 3 vitesh për të bërë 7 herë më shumë për këtë vend dhe njerëzit e këtij vendi. Ka vetëm një gjë që duhet të kërkoni nga vetja, llogari vetes. Jam po unë ai që i neveris ata që deputetët i barazojnë me të keqen.”

Në fund, pretendimet e Kryeministrit Edi Rama për mandatin e tretë bëhen edhe më tragji-komike pasi publikon emrat e drejtuesve të ri politik në qarqe me të cilët nuk fiton dot jo në një garë normale por edhe sikur të përsëritet “30 Qershori 2019” :

Kukës-Safet Gjici

Shkodër – Ilir Beqaj

Lezhë-Lindita Nikolla

Tiranë , Erjon Veliaj, Elisa Spiropali / Kryetari Ervini Bushati

Durrës përkohësisht Edi Rama.

Dibër-Olta Xhaçka

Elbasan- Taulant Balla

Korçë- Niko Peleshi

Fier-Gramoz Ruçi

Vlorë-Damian Gjiknuri

Gjirokastër- Bledi Çuçi