Njohja e Kosovës nga Vatikani do ta përshpejtonte procesin e integrimit në BE
Presidentja e Kosovës, Vjosa Osmani, në takim me nuncin apostolik në Lubjanë, njëherësh delegat apostolik për Kosovën, monsinjor Jean Marie Speich, diksutuan mbi raportet e Republikës së Kosovës me Selinë e Shenjtë.
“Presidentja Osmani e falënderoi Speich për kujdesin që Vatikani ka treguar në vazhdimësi ndaj popullit të Kosovës ku dhe shprehu bindjen se raportet me Vatikanin mund të thellohen edhe më tej dhe gatishmërinë e institucioneve të vendit që të punojnë ngushtë me Selinë e Shenjtë për thellimin e mëtejmë të këtij bashkëpunimi,” thekson Presienca në njoftimin për media.
Në anën tjetër, monsinjor Jean Marie Speich e falënderoi presidenten Osmani për pritjen dhe shprehu gatishmërinë e tij dhe të Selisë së Shenjtë për vazhdimin e bashkëpunimit dhe thellimin e mëtejmë të tij.
Ndërsa Kryetari i Parlamentit të Kosovës, Glauk Konjufca, në takim monsinjor me delegatin apostolik për Kosovë dhe njëherësh Nunc Apostolik në Slloveni, Jean-Marie Speich, duke u fokusuar në rëndësinë e vendosjes së marrëdhënieve të plota diplomatike, vuri në pah se njohja e pavarësisë nga shteti i Vatikanit do ta përshpejtonte procesin e integrimit të Republikës së Kosovës në Bashkimin Evropian. .
Në njoftimin për medie thuhet se Konjufca vlerësoi lart mbështetjen e Vatikanit, duke theksuar se Selia e Shenjtë dhe personalisht Papa Gjon Pali II kanë qenë gjithmonë në përkrahje të aspiratave të popullit të Kosovës për liri dhe pavarësi.
Në takim u konfirmua përkushtimi për avancimin e raporteve të ndërsjella dhe angazhimi i përbashkët për të përparuar në marrëdhëniet diplomatike me Selinë e Shenjtë.
