Noc Rroku mbërtheu zinxhirin!
nga Agim Popoci
“Mezi pres privilegjin e madh të punoj me Presidentin e 47-të për të përmirësuar më tej partneritetin tonë për paqe, prosperitet dhe përparim të mëtejshëm,” tha sot Kryeministri Edi Rama duke uruar për fitore të jashtëzakonshme, Presidentin e ri të SHBA, Donald Trump!
Nuk dihet se për cilin partneritet, paqe, prosperitet dhe përparim të mëtejshëm e ka fjalën sot Kryeministri Edi Rama, kur vetëm pesë ditë më parë ai jo vetëm që e mohoi projektin real amerikan që ka sjell Washingtoni dhe të gjithë shqiptarët filluan ta besojnë ndonëse ka filluar dhe po iu burgos idhujt e tyre, SPAK-un, por, tha se “Amerika ka sjellë Noc Rrokun”!
Sikur t’i punonin frenat Edi Ramës, dhe të ndalonte pa e thënë këtë togfjalësh para atyre shqiptarëve që kanë filluar të besojnë se janë amerikanët ata që i hapën rrugën SPAK-ut për të goditur çdo shkelje ligjore pa marrë parasysh pushtetin politik, Reformës në Drejtësi edhe mund t’i zgjatej jeta në këtë Shqipëri të trazuar politike ku reanimacioni shoqëror vazhdon të menaxhohet me ca komunistë të trajnuar në bankat e Partisë, që rrëfenjën se çdo gjë në këtë tokë shqiptare e solli Partia, jo vetëm që e kanë besuar por i janë përulur për 45 vjet, pa fije dyshimi!
Por, nuk quhet kot Edi Rama, dhe, është Kryeministri i vetëm në këtë botë që drejton shtetin me këshillat e Gjyshes dhe Taksistit!
Kovës së mbushur me ca padi nga më të çuditshmet nga dora e SPAK-ut, Edi Rama i futi një shkelm të mirë duke derdhur për toke në sytë e shqiptarëve që prisnin prangosje nga amerikanët të ca ministrave dhe drejtorëve socialistë, së bashku me Taulant Ballën, Lali Erin, Fatmir Mediun, Zotni Lafshën dhe Benet Becin, jo vetëm dyshimet por dhe shpresën e atyre që kishin filluar ta ëndërronin një Shqipëri me drejtësi të reformuar amerikane:
“SPAK-un e ka sjellë Partia Socialiste e Shqipërisë me mua në krye!”
A do të ishte më mirë që Amerika të sillte SPAK-un apo Noc Rrokun, këtë shqiptarët normal nuk e gjykojnë dot, përveç elektoratit përreth Alexit që analizon fotot e Plazhistit Edi Rama, dhe, vendos!
Shqiptarët normal e kanë provuar kur një gjë sjellë Partia Socialiste, ajo nuk ka konkurrencë as me helmin më të madh që njeh njerëzimi, Botulinumin!
Një pikë Botulinumi vret qindra mijëra njerëz, por një kokë injoranti në krye të kësaj partie që ishte për 45 vjet dhe i tillë është edhe sot, jo vetëm të jep Noc Rrokun kur i kërkon bukë, djath, mish, frigorifer, apartament dhe çdo gjë tjetër për të mbijetuar, por, të degdis në qeli kur i kërkon drejtësi për atë që nuk e ke bërë, e nëse konstaton se ti nuk mbush siç do Partia edhe të vret! Pa Botulinum!
Por, shqiptarët normal e kanë provuar edhe rastin kur kjo Parti kriminale e Edi Ramës, si në fillim të viteve ’90-të, jo me vullnetin e saj largoi nga sytë e botës, Noc Rrokun!
Pse nuk u zhduk nga faqja e dheut Noc Rroku kur u rrëzua busti i diktatorit Enver Hoxha, kjo nuk është pyetje as për Amerikën, as për Sigurimin e Shtetit që u zhduk për momentin nga sytë e botës dhe nuk pranoi ta lë këtë Parti kriminale pa oksigjen! Por, për shqiptarët!
A do ta mbërthen sërish Edi Rama zinxhirin e Noc Rrokut që në sy të botës të mos përdoret më në pazar nga Alexi apo të ngjashmit, me pretekstin se mezi pret privilegjin e madh të punoj me Presidentin e 47-të të SHBA, Donald Trump, ky nuk është një problem i Kryeministrit aktual të Shqipërisë, por, një realitet i papranueshëm për shqiptarët, pavarësisht rrethanave që mund të krijohen me dhuratën që Rama po i përgatitë dhëndrit të Trumpit, Ishullin e Sazanit!
Për shqiptarët normal është fjala…
