Norvegjia, Irlanda dhe Spanja: Më 28 Maj do të njohim shtetin e pavarur të Palestinës

Norvegjia, Irlanda dhe Spanja kanë bërë të ditur sot se kanë vendosur ta njohin Palestinën si shtet të pavarur më 28 Maj, duke argumentuar sërish se zgjidhja me dy shtetet është zgjidhja e vetme për paqe afatgjate në konfliktin izraelito-palestinez.

Kryeministri i Norvegjisë, Jonas Gahr Store, ishte i prerë edhe sot se nuk mund të ketë paqe në Lindjen e Mesme, nëse nuk ka njohje.

“Besojmë se zgjidhja me dy shtetet është në inetersin më të madh për Izraelin. Duke e njohur Palestinën si shtet, Norvegjia e mbështet planin për paqe. Palestina ka të drejtë thelbësore për të qenë shtet i pavarur,” tha Jonas Gahr Store sot pas shpalljes së vendimit duke shtuar se qëllimi është të realizohet shteti palestinez i cili politikisht është kohezive dhe e cila del nga qeverisja palestineze.

Kryeministri i Irlandës, Simon Harris, tha se ky ishte një vendim i përbashkët mes vendit të tij, Spanjës dhe Norvegjisë.

“Kjo është një ditë historike dhe e rëndësishme për Irlandën dhe Palestinën. Vendimi për ta njohur Palestinën si shtet ka për qëllim të ndihmojë në gjetjen e një zgjidhjeje për konfliktin palestinezo-izraelit përmes zgjidhjes me dy shtete,” tha Simon Harris.

Ndërkohë Kryeministri i Spanjës, Pedro Sanchez, duke ju drejtuar parlamentit sot tha se vendi i tij do ta njohë Palestinën si shtet më 28 maj.

Pas këtyre shpalljeve të vendimeve të shtetit të Norvegjisë, Irlandës dhe Spanjës për njohjen e shtetit të paavrur të Palestinës me 28 Maj ka reaguar Izraeli duke tërhequr ambasadorët nga shtetet përkatëse dhe duke ftuar ambasadorët e të treja shteteve në Izrael për sqarim, ku siç u tha, në ministrinë izraelite të Punëve të Jashtme do t’u lëshohen videot e momenti kur u rrëmbyen ushtaret izraelite më 7 tetor.

“Historia do të kujtoj se Spanja, Norvegjia dhe Irlanda kanë vendosur të ndajnë medaljen e arit për vrasësit dhe përdhunuesit e Hamasit, që përdhunuan adoleshente dhe djegën bebe. Kam urdhëruar që ambasadorët të thirren në bisedime ku do të shohin një video të tmerrshme të rrëmbimit për të ilustruar se çfarë vendimi të mbrapsht kanë marrë qeveritë e tyre. Izraeli nuk do ta kaloj në heshtje këtë lëvizje, ajo do të ketë pasoja serioze,” tha ministri izraelit i Punëve të Jashtme, Israel Katz.

Ndryshe, para shpalljes së këtij vendimi nga Novergjia, Irlanda dhe Spanja, shtetin e pavarur të Palestinës e kanë njohur 142 nga 193 shtete anëtare të Kombeve të Bashkuara.