Nuk dha dorëheqje, shkarkohet Drejtori i Policisë Gledis Nano, ministri: Nuk realizoi objektivat!
Nuk dha dorëheqje pas vrasjes makabre të një fëmije me skaf nga efektivi i policisë në Himarë, nuk dha dorëheqje as me skemën kriminale socialiste që iu afrua përmes mediave, dhe sot ndodhi ajo që pritej, Drejtori i Përgjithshëm i Policisë së Shtetit, Gledis Nano, sot u shkarkua nga Qeveria e Shqipërisë.
Pas mbledhjes së qeverisë, duke publikuar lajmin, Ministri i Brendshëm, Bledi Çuçi tha sot se Gledis Nano nuk përmbushi objektivat.
“Sot qeveria mori vendim për shkarkimin e Drejtorit të Përgjithshëm të drejtorit të Policisë, shkarkim i cili lidhet me mospërmbushjen e objektivave që kishim vënë në lidhje me drejtorin e përgjithshëm të policisë dhe kryesisht lidhet me situatën e krijuar në muajt e fundit, situatë që normalisht kërkon një reagim më të fortë dhe një menaxhim më efikas të Policisë së Shtetit. Për momentin detyrat do t’i ushtrojë nëndrejtori i përgjithshëm i Policisë dhe shumë shpejt besoj që do t’ju lajmërojmë dhe për emërimin e drejtorit të ri të Policisë së Shtetit,” tha Çuçi duke bërë të ditur se Policia e Shtetit do të drejtohet përkohësisht nga nëndrejtori i Policisë Tonin Vocaj.
I pyetur nëse kjo do të zgjidhte situatën në vend, kur zinxhiri i Policisë Kufitare në Vlorë që u tha se u shkarkua pas ngjarjes në Himarë është rikthyer sërish në detyrë, Bledi Çuçi tha se puna do jetë e gjithanshme, por këto që përmendët kanë qenë dhe një nga arsyet kryesore që Policia e Shtetit dhe drejtuesi i Policisë së shtetit kërkon një reagim më të fortë ndaj këtyre fenomeneve dhe një menaxhim më efikas.
Kështu, në kulmin e situatës kriminale në vend Policia e Shtetit mbetet pa një drejtues të dështuar dhe me një Qeveri që inkurajon krimin “të hajnë kokat në mes vete”!
Ndërsa Gledis Nano do të mbahet në mend si një ekspert i cili erdhi në krye të Policisë së Shetit për më pak se 11 muaj, për ti mundësuar krimit që vetëm për tetë muaj të vitit 2022 të lë gjurmë të frikshme me bilanc lufte, 47 viktima!
Ndërkohë Zv/Kryeministrja dhe Ministrja e Infrastrukturës dhe Energjisë, Belinda Balluku ka bërë të ditur se me vendim të Këshillit të Ministrave sot janë liruar nga detyra dy Zv/Ministra.
“Lirimi nga detyra i Zv/Ministrit të Infrastrukturës, Ardi Veliu, dhe lirimi nga detyra i Zv/Ministres së Mbrojtjes, Dallëndyshe Bici. Do kenë detyra të reja në vijim,” tha Belind Balluku.
