Nuk do regjistrimin e makinave por tension, Vuçiç: Do jemi me serbët në veri të Kosovës!

Pasi Kryeministri i Kosovës e bëri të qartë se shtyrje të afatit për targa nuk do të ketë, ka reaguar Presidenti i Serbisë, Aleksandar Vuçiç, konfirmoi se është ai që nuk i lejon serbët ti regjistrojnë makinat me targa të Kosovës ndërsa theksoi se shteti serb do të jetë me ata serbë në Kosovë që e kundërshtojnë Albin Kurtin.

I pyetur sot se a do të filloj konfiskimi i makinave të serbëve të Kosovës pas 31 tetorit, nëse nuk i regjistrojnë makinat me targat RKS, Aleksandar Vuçiç tha se nuk mund të pritet reagimi i bashkësisë ndërkombëtare sepse të gjithë nga Quinti do të thonë se janë kundër, dhe se kanë kërkuar nga Prishtina shtyjen por Kurti ishte kundër.

“Kohë e keqe për popullin tonë është para nesh dhe do të ishte çmenduri që sot të parashikojmë diçka. Do të jemi me serbët në Kosovë, që kanë treguar se nuk dëshirojnë të dëgjojnë Kurtin, dhe as të tjerët, por veten dhe ndërgjegjen e tyre, dëshirojnë që të respektohen të drejtat e tyre,” tha Vuçiç duke u mburrur madje se në veri të Kosovës vetëm dy makina janë regjistruar e Prishtina priste 7.000, por, nuk tregoi se sa makinave u është vënë flaka që kanë regjistruar makinat me targat RKS.

Ndërsa Drejtori i Zyrës për Kosovën pranë Qeverisë së Serbisë, Petar Pekoviç, me gjuhë më rrugaçërore se shefi i tij tha se Albin Kurti kot e ka edhe kur ndryshon strategji sepse serbët nuk i duan targat RKS por ato të shtetit të Serbisë dhe rriti numrin e targave në 9.000.

“Me video-klipe të dështuara, Albin Kurti tani ka kaluar në mesazhe SMS. Kot ndryshon strategji, serbët nuk i duan targat RKS, por targat e shtetit të Serbisë! Dhe këtë ia dëshmuan në veri – dy të regjistruar nga 9.000 serbe,” thekson përmes reagimit në rrjetin social Twitter, Petar Petkoviç.

Ndryshe, sot kryeministri i Kosovës, Albin Kurti, tha se shtyrje të afatit për targat nuk do të ketë dhe kjo do të jetë befasi për kriminelët.

“Nuk duam të befasojmë aleatët tanë, por duam të befasojmë kriminelët,” tha Albin Kurti edhe pasi u bë e ditur se Shtetet e Bashkuara dhe Bashkimi Evropian i kanë kërkuar Kosovës, shtyrjen e afatit për targat edhe për 10 muaj, duke arsyetuar me shmangien e tensioneve në veri, kërkesë kjo që u dëgjua edhe nga ata që e quajnë veten shoqëri civile në veri të Mitrovicës.

Ndryshe, Vendimi për targat ishte parashikuar të hynte në fuqi më 1 gusht, por u shty për një muaj pas incidenteve armatosura që ndodhën në veri të Kosovës.