“Nuk e kupton”, Rama: Çfarë presioni është të kërkosh hetimin e një Ish-Presidenti dhe një Ish-Kryeministri të shpallur non grata nga SHBA

Kryeministri Edi Rama vazhdoi edhe sot të jetë i bindur se nuk ka bërë presion ndaj drejtësisë as në Kongresin as në Asamblenë e PS kur ka akuzuar SPAK-un, por se ka bërë një kërkesë legjitime, hetimin e Ilir Metës dhe Sali Berishës me akuzat më të rënda të mundshme që lidhen drejtpërdrejt me veprimtarinë e institucioneve të këtij vendi.

“Të kërkosh më shumë nga drejtësia kur vettingu po bën 5 vjet, SPAK-u po mbush 3 vjet nuk do të thotë të bësh presion se përndryshe çfarë do duhet të thoshim për deklaratat e përfaqësuesve të BE-së apo SHBA-ve. Ku është kërkuar dhe hapur nominalisht ndëshkimi i politikaëve apo i gjykatësve të korruptuar. Presion mbi drejtësinë, sipas meje jo. Sipas meje një kërkesë legjitime për të kërkuar më shumë nga drejtësia. Në ndërkohë që për drejtësinë është bërë investimi më i madh në historinë e këtij vendi, në aspektin politik qoftë nga partia në pushtet, PS-ja, qoftë nga miqtë dhe partnerët ndërkombëtarë.

Nuk jam unë ky që them se drejtësia po gabon se po vjen te ana ime. Unë po them që si po vjen në anën tonë të shkojë dhe në anën tjetër, ne duam drejtësi 360 gradë. Jam shumë dakord me ambasadoren amerikane nuk kam asnjë dalim këtu, ku e shihni ju dallimin? Po flas për ndërhyrjet, për ndërhyrje për presion, këtë mua nuk ma thotë dot askush as anglisht, as shqip, as gjermanisht, as frëngjisht, fare,” tha Edi Rama duke mos e pranuar edhe sot se nuk po bënë presion:

“Çfarë presioni është të kërkosh hetimin e një ish-presidenti dhe një ish-kryeministri të shpallur non-grata nga SHBA-të me akuzat më të rënda të mundshme që lidhen drejtpërdrejt me veprimtarinë e institucioneve të këtij vendi,” tha Kryeministri Edi Rama duke u shprehur qartë se po mos të kishte ai vullnet nuk do të bëhej Reforma në Drejtësi pavarësisht ndihmës së madhe të Shteteve të Bashkuara.

Ndërsa Ministri i Drejtësisë, Ulsi Manja, i cili ka heshtur në të gjitha skandalet e mëdha të qeverisë socialiste, duke i mbajtur ison Kryeministrit renditi 10 prokurorë e gjyqtarë të shkarkuar nga Vetingu, pasi nuk justifikuan pasuritë e ndërtuara gjatë karrierës së tyre por nuk janë hetuar nga drejtësia

“Nga 197 prokurorë e gjyqtarë  të larguar dhe 450 të dorëhequr nga frika e vetingut, po u rendis top listën e 10 gjyqtarëve dhe prokurorëve që kryesojnë listën dhe mua askush s’më thotë dot pa e hetuar drejtësia e re, se nga e kanë vënë këtë pasuri që nuk e justifikojnë dot .

Subjekti i parë me 857 mln lekë të vjetra të pajustifikuara, ose 714 euro, që në jetën e vet ka bërë vetëm punën e prokurorit, ta hetojë drejtësia e re sepse për këtë e ngritëm; 800 mln lekë të vjetra subjekti i dytë, ky jo vetëm mungesë burimesh por ka ngel dhe te pastërtia e figurës, lidhje me botën e krimit të organizuara; 691 mln lekë të vjetra tjetri; 600 mln lekë të pa justifikuara,  por ky rezulton i lidhur me subjektin e pestë, se janë bashkëshortë, 550 mln lekë të vjetra ka bashkëshortja; 460 mln lekë tjetri dhe e mbyll i 10 në listë me 129 mijë euro; Doni më apartamente? 13 apartamente, shpi, dyqane, vilë, është larguar nga vetingu; Tjetri 3 vila, janë vendime këto nuk po i them unë.

10 pasuri tjetri, ndërsa një subjekt tjetër jo vetëm që ka deklarim të rremë dhe mungesë burimesh por ka ndërtuar dhe vilë pa leje në tokën e dikujt tjetër, dhe më lejoni miq, se ne kemi një kuadër ligjor të ashpër për ndërtimet pa leje, drejtësia jonë e re ka dënuar dhe për një avlli pa leje, ky ka kryer dhe vepër penal. Po kjo pse nuk fillon kryesisht? Të qepen mbrapa me shku një kallzim me të kap 22 prokuroritë e vendit për ndërtim pa leje dhe në fshatin më të thellë, me rrënje e degë ta zbardhin çështjen për katër ditë,” tha Ulsim Manja i cili heshtë për vjedhjet e zyrtarëve socialistë ndërsa e quan këtë dukuri korrupsioni me prokurorë dhe gjyqtarë si shqetësim i PS lidhur me zbatimin e Reformës në Drejtësi, sepse sipas është koha qytetarëve shqiptarë tu kthejmë mbrapsht me hetime zbardhjen e të vërtetës, tu japim përgjigje!

Pra, sipas logjikës së Ministrit të Drejtësisë, e vërteta zbardhet kur të znardhen gjitha vjedhjet që nuk janë bërë nga socialistët!