Nuk e ndalon as koronavirusi, Isa Mustafa mbledhë votat për shkarkimin e Albin Kurti
U konsiderua me shëndet të ligë, por Isa Mustafa është hera e dytë që merr forcë për ti shërbyer Hashim Thaçit. Herën e parë e bëri në garën për kryetar të LDK kur mashtroi mikun e tij të shtëpisë, Bujar Bukoshi, dhe sot mikun e tij të koalicionit qeverisës Albin Kurti. Për dallim nga hera e parë, Kosova përveç se nga Serbia nuk kërcënohej edhe nga një armik i frikshëm si koronavirusi, por kjo nuk e pengon Isa Mustafën ti jap fund këtij misioni shumë kompleks i cili nisi pas shkarkimit të aksionerit kryesor të LDK, Agim Veliu, nga ministri i Brendshëm dhe përfundoi me “antiamerikanizmin” e Albin Kurtit!
Sot Isa Mustafa takoi kryetarin e Aleancës për Ardhmërinë e Kosovës, Ramush Haradinaj, për ta bindur që AAK ti bashkohet mocionit të Lidhjes Demokratike të Kosovës për shkarkimin e Albin Kurtit.
“Temë diskutimi ishte inicimi i mocionit për shkarkim të Qeverisë Kurti. Në bisedim me Isa Mustafën e njoftova se qëndrimi i AAK-së, është pro, ne e përkrahim,” tha Ramush Haradinaj duke e bërë situatën edhe më konfuze pasi ishte ai që u largua nga posti i kryeministrit pikërisht për shkak të antiamerikanizmit me mospanimin e heqjes së taksës.
Gjithsesi, kryetari i AAK-së, Ramush Haradinaj, tha se është mirë të ndërmerren veprime dhe të krijohet Qeveria e re.
Dhe, më shumë i ligu se shëndetligu, Isa Mustafa, zhvilloi takim edhe me Kryetarin e Nismës Socialdemokrate, Fatmir Limaj. Pas takimit, Limaj deklaroi se do të mbështesin mocionin e mosbesimit ndaj Qeverisë Kurti, por në këtë kohë, tha ai, nuk është e domosdoshme që vendi të shkojë në zgjedhje.
“Kjo çështje duhet të përfundojë sa më shpejtë, pasi vendimi politik tanimë është marrë dhe mbetet vetëm çështjet teknik në Kuvend.”
Ndërkohë, deri sa Isa Mustafa ishte duke e çuar amanetine Hashim Thaçit deri në fund, Bashkimi Europian caktoi si Përfaqësues të Posaçëm të BE për dialogun Kosovë-Serbi, antishqiptarin dhe proserbin më të njohur në familjen europiane, Mirosllav Lajçak. Duke pasur parasysh të kaluarën e Lajçak jo vetëm si ministër i Jashtëm i Sllovakisë dhe rolin e tij si kryesues i OSBE-së, misioni i Isa Mustafës do të jetë lehtësisht i realizueshëm.
Ndryshe, si mund ta shkarkoi Isa Mustafa, Kryeministrin Albin Kurti. Neni 100 i Kushtetutës së Kosovës përcakton qartë mënyrën se si votohet Mocioni i Votëbesimit për Qeverinë.
“Mocioni i mosbesimit ndaj Qeverisë mund të ngrihet me propozimin e një të tretës (1/3) të të gjithë deputetëve të Kuvendit. Votëbesimin e Qeverisë mund ta kërkojë Kryeministri. Mocioni i mosbesimit vihet në rendin e ditë të Kuvendit, jo më vonë se pesë (5) ditë e as më herët se dy (2) ditë nga data e parashtrimit të tij”, thuhet në pikën 1, 2 dhe 3 të këtij neni.
Derisa pika 4 flet se në çfarë rrethane konsiderohet votëbesimi i pranuar. “Konsiderohet se mocioni i mosbesimit është pranuar, nëse për të kanë votuar shumica e të gjithë deputetëve të Kuvendit të Kosovës”, thuhet në këtë pikë.
Sipas Kushtetutës së Kosovës, nëse mocioni i mosbesimit dështon, mocioni tjetër i mosbesimit nuk mund të ringrihet gjatë nëntëdhjetë (90) ditëve të ardhshme. “Nëse mocioni i mosbesimit votohet për Qeverinë në tërësi, Qeveria konsiderohet në dorëheqje”, thuhet në pikën e 6 të këtij neni.
