Nuk është Luli, Taulant Balla: Mos ia vini veshin Saliut sepse s’i hy në punë njeriu!
Shtyrja e mandatit të vettingut është një moment historik dhe që i shërben të gjithë shqiptarëve tha Kryetari i Grupit Parlamentar të PS, Taulant Balla, ashtu si dhe Kryetari i shkarkuar i PD, Lulzim Basha, të cilin e kopjoi në ide edhe për liderin historik të PD, Sali Berisha, për të cilin tha se se s’i hy në punë njeriu!
“U miratua zgjatja e mandateve të afatit të vettingut. Këtu fitoi Shqipëria dhe çuarja përpara e reformës historike në drejtësi. Unë asnjëherë nuk i shmangem pyetjeve, edhe kur ato ngrihen në bazë të sajesave. Nuk është i vërtetë sajimi i radhës. Thirrja ime për ju është mos ia vini veshin Saliut sepse s’i hy në punë njeriu,” tha Taulant Balla pas takimit që zhvilloi me Bashën te Gjergj Luca ndërsa e përsëriti Lulin edhe për Komisionet për reformën zgjedhore dhe atë territoriale:
“PS do të ketë tetë anëtar në secilën prej komisioneve. Bashkëkryetar i komisionit do të jetë Gjiknuri nga PS. Sot kam diskutuar një diskutim me anëtarët e grupit për përbërjen e Komisionit territorial, për ngritjen e këtij Komisioni. Ajo që dua të them është që të propozojmë qoftë bashkëkryetarin, qoftë kryetarin tjetër për të filluar punën. Mandati do të jetë 6 mujor dhe besoj se janë të mjaftueshme për të gjitha propozimet. Demokracia është sistemi ku duhet të biem dakord, nëse nuk biem dakord ju e dini zgjidhjen. Nuk dua të paragjykoj asnjë nga puna e këtij komisioni. Ka shumë çështje që duhet të diskutohen.
Nuk ka pasur negociata për këto çështje. Është ndërgjegjësimi edhe i deputetëve dhe i grupit parlamentar të grupit më të madh të opozitës. Ne menduam t’i mbështesim,” tha Balla ndërsa për Reformën zgjedhore shtoi:
“E para nuk dua të flas tashmë fare për këtë çështje, sepse kjo i takon Komisionit të Posaçëm të Reformës Zgjedhore, të gjitha propozimet që kanë duhet t’i drejtohen Komisionit të Posaçëm. Natyrshëm e kam thënë dhe do kërkoj që komisioni i posaçëm të përmbledhë edhe ndryshime që kanë të bëjnë me ligjin për partitë politike. Të mos harrojmë që kemi pasur plot raste dhe një ndër rastet që kam bërë publike ka qenë një financim i dyshimtë që Basha dhe PD kanë marrë dhe kanë zhvilluar një proces lobingu. Në këtë çështje legjislacioni shqiptar duhet të jetë më i fortë. Pyetjes tuaj nuk do i përgjigjem sepse të gjitha çështjet do ia lejojmë Komisionit të Posaçëm,” tha Kryetari i Grupit Parlamentar të PS, Taulant Balla, duke u munduar ta bind opinionin publik që Lulzim Bashën e ka edhe opozitë, ashtu si dhe për deklaratën e djeshme se “Rama po bënte gati një tjetër ministër kurban”:
“Prangat e Bashës janë fabul që ai duhet të mbajë përgjegjësi për shumë pisëllëqe që ka bërë me Berishën. Komisioni Hetimor po zhvillon punën e vet dhe duhet të presim raportin përfundimtar dhe besoj që pasi komisioni të ketë hartuar atë raport ta lexojë me vëmendje. Kuvendi i Shqipërisë po ushtron mekanizmat kontrollues, edhe për çështjet e ngritura nga opozita.”
Gjithsesi, prangat mund të jenë edhe fabulë por jo dhe takimi që zhvilloi me Bashën te Gjergj Luca ku, siç tha Sali Berisha, ishin të pranishëm Erjon Velia dhe Irfan Hysenbelliu, takim të cilin Taulant Balla nuk e përgënjeshtroi.
