Nuk hapet dosja McGonigal, Berisha: Altin Troplini, mburojë e Edi Ramës, Agron Nezës e Dorian Duçkës

Kryetari i Partisë Demokratike, Sali Berisha, ka denoncuar sot kreun e SPAK si mburojë e Edi Ramës, Agron Nezës dhe Dorian Duçkës, duke mos hapur dosjen McGonigal, duke siguruar Altin Dumanin se do të jetë opozita ajo që do të hetojë Ramën, McGonigalin dhe Dumanin!

“Jam këtu për të denoncuar publikisht, Altin Troplinin, për heshtjen dhe mburojën e tij, mbrojtjen e tij, të Edi Ramës, Agron Nezës dhe Dorian Duçkës, duke mos hapur dosjen McGonigal.

McGonigal, një armik i egër i presidentit aktual Donald Trump. Një nga njerëzit më kryesorë në aferën e dosjes së mashtrimit të madh rus, i njohur për këto botërisht, për të cilin 2 javë më parë FBI rihapi dosjen, edhe njëherë, konkretisht, për McGonigalin, Altin Troplini hesht si fija e barit. Paçka se, McGonigal u kontraktua nga Edi Rama, u kontraktua nga zyrat e Edi Ramës, iu dërguan dëshmitarë në New York për të kryer misionin e tij kundër opozitës.

Paçka se, McGonigal urdhëroi Ramën të heqë licenca të një kompanie ruse, për t’ia dhënë një kompanie tjetër ruse, të lidhur me Deripaskën. Paçka se, famëziu McGonigal vendosi gjoba të tmerrshme, një gjer në 5 milionë euro bizneseve shqiptare, duke i mashtruar me blacklistim.

Paçka se McGonigal, udhëtoi në Vjenë, duke përzgjedhur dhe një prokuror amerikan, udhëtoi në Vjenë më ministër të narkoqeverisë Rama, për të dëgjuar përrallat e Tom Doshit dhe dhe Durim Bamit, se si kishte nxitur Ilir Meta Durimin për të vrarë Tom Doshin.
Pra, aktiviteti kriminal i McGonigal dhe Edi Ramës është më i dënueshmi pas atij që McGonigal ka kryer në SHBA ndaj presidentit në detyrë, Donald Trump, pas ardhjes së tij herën e parë në pushtet.
Me gjithë këto, Altin Troplini, ky mercenar, që nuk ka as ligj as oral, mban në sirtar dosjen e McGonigal prej dy vitesh, të dorëzuar aty, nga opozita.

E garantoj Altin Troplinin se, do të jetë opozita që do të hetojë Ramën, McGonigalin dhe Altin Troplinin, së bashku, të lidhur ngushtë në një krim të shëmtuar,” tha Sali Berisha duke sqaruar se Opozita do krijojë Komisionin hetimor parlamentar për veprimtarinë kriminale, Rama-McGonigal, në Shqipëri e Kosovë

“Opozita do krijojë komisionin hetimor parlamentar dhe do u dëshmojë shqiptarëve veprimtarinë kriminale, Rama-McGonigal në Shqipëri, do përpiqemi të hetojmë edhe me Kosovën, se kjo veprimtari është shtrirë dhe në Kosovë, sikundër do të demaskojë me prova dhe fakte mbrojtjen që Altin Troplini i ka bërë McGonigalit, delinkuent dhe një nga protagonistët kryesorë në mashtrimin e madh të dosjes ruse për presidentin Donald Trump, në mandatin e tij të parë,” tha Kryetari i Partisë Demokratike, duke rikujtuar se McGonigal po rihetohet nga FBI, besimplotë se do rishqyrtohet edhe një herë komponenti shqiptar përfundoi:

“Kam besim të plotë se, FBI po e riheton rolin e McGonigal në aferën, në mashtrimin e madh, me të cilin synohej përmbysja e presidentit të zgjedhur të SHBA-ve nga pushteti.
Jam i bindur se, komponenti shqiptar i kësaj do rishqyrtohet edhe një herë, dhe se Altin Troplini, nuk do mund të fshehë kurrë aktivitetin kriminal të Edi Ramë dhe McGonigalit në Shqipëri.”