Nuk i bën ftesë për seancë/ Thaçi, arrogant si Rama dhe injorant si Meta, mbanë konferencë për media

Pasi Kryetarja e Parlamentit, Vjosa Osmani nuk i bëri ftesë për sot Presidentit të Kosovës, Hashim Thaçi, për siç abuzoi Presidenti raportimit për vizitën e tij në SHBA sepse edhe teknikisht ishte e pamundur, Thaçi zhvilloi një konferencë për media ku foli për gjithçka vetëm jo për një takim të mundshëm me Kryeministrin Albin Kurti.

Ai foli për takimet në Kongresin Amerikan, ku është pritur nga Kryetari i Komisionit për Politikë të Jashtme, Eliot Engël dhe Këshilltarit për Siguri Kombëtare të Presidentit të SHBA, Robert O’Brien.

“Kryesuesin Engël e falënderova për përkrahjen e vazhdueshme dhe u pajtuam se ka një rikthim të vëmendjes së Washingtonit në çështjen e Kosovës dhe se duhet të shfrytëzojmë këtë mundësi për të arritur marrëveshjen përfundimtare për paqe në mes të Kosovës dhe Serbisë,” tha Thaçi ndërsa për takimin me Robert O’Brien tha se theksi ishte tek gjasat për arritjen e një marrëveshjeje përfundimtare paqësore dhe roli qenësor i Washingtonit në këtë proces.

“Me ftesë të Ambasadorit Riçard Grenell, i Ngarkuari Special i Presidentit Trump për dialogun në mes të Kosovës dhe të Serbisë, dhe në prezencë të Robert O’Brien, Këshilltari për Siguri Kombëtare i Presidentit të Shteteve të Bashkuara të Amerikës, jam takuar me Presidentin e Serbisë, Aleksandër Vuçiç,” tha Thaçi duke vlerësuar se ky takim është i rëndësishëm për disa arsye.

“E para, takimi shënon rikthim zë fuqishëm të Shteteve të Bashkuara të Amerikës në procesin e kërkimit të marrëveshjes së paqes në mes të Kosovës dhe Serbisë. Këtë e kemi kërkuar të gjithë në Kosovë. E kujtoj sa kemi punuar që jo vetëm të shtojmë prezencën amerikane në proces, por që ta bëjmë të mundur që Uashingtoni të marrë rol bosht, në këtë proces’, ka shtuar ai.

E dyta, sipas tij, takimi shënon gatishmëri për të vazhduar procesin pas një stagnimin prej më shumë se një viti.

“E treta, takimi në Washington është i rëndësishëm sepse e bën më të afërt marrëveshjen, i bën më reale gjasat për një marrëveshje të përhershme.”

Për taksën ai tha se duhet të hiqet sa më parë dhe të mos përsëritet rasti i demarkacionit.

“Nuk duhet të përsëritim ngjarjen e demarkacionit, e ka shtyrë vendimin për liberalizimin e vizave. Më interesantja pas tri vitesh votohet, por momentumi humbet. Në të njëjtën kohë mundësia e dhënë në Berlin u humb dhe prapë jemi pa liberalizim të vizave. Nuk duhet të vonohemi, duhet të veprojmë sepse qytetarët e Kosovës nuk kanë kohë për të pritur. Ne të gjithë liderët e Kosovës jemi të zëvendësueshëm, roli i ShBA është i pazëvendësueshëm, kush dëshiron ta sfidoj këtë do të shkaktojë probleme.”

Me këtë rast Thaç ka bërë dhe një vlerësim të procesit të dialog tash e 10 vjet që është mbajtur në Bruksel, me ndërmjetësimin e BE-së dhe me mbështetje të SHBA-së.

“I jemi mirënjohës të gjithë atyre në BE që na kanë përkrahur dhe mbështetur në këtë proces. Pas çdo takimi në Bruksel, unë kam raportuar në Kuvendin e Kosovës. Procesi ka qenë gjithmonë transparent,” tha ai i bindur se ky proces arriti maksimumin e asaj që mund të arrinte.

“Mungesa e unitetit ndër shtetet anëtare të BE-së, u reflektua edhe në gjasat dhe mundësitë e arritjes së një marrëveshjeje në mes të Kosovës dhe Serbisë. Më lejoni ta ilustroj këtë me një shembull. BE dhe shtetet anëtare të BE-së nuk i a arritën të bindin as 5 anëtaret e BE-së që të njohin Kosovën e le më të bindin Serbinë që të njohë Kosovën. Kjo është gjendja në të cilën e gjejmë veten pas gati një dekade të dialogut nën BE-në.”

Vonesa, tha Thaçi, nuk është në interesin tonë, duhet të jemi përsëri të mençur, të shfrytëzojmë rastin e ofruar dhe të bëjmë hapin tjetër të madh, strategjik për Kosovën.

“Kështu kemi vepruar në Rambuje, kështu kemi vepruar në Vjenë. Dhe në fund kemi qenë ne ata të cilëve u ka rënë mirë. Kemi qenë ne ata që kanë dalë fitimtarë. Në pozitë të njëjtë jemi edhe sot. Kemi Presidentin Trump që ka shtuar vëmendjen në Kosovë dhe në rajon. Kosova nuk ka gëzuar kaq vëmendje që nga shpallja e pavarësisë. Kemi një emisar amerikan që me guxim dhe vizion po e shtynë përpara dialogun dhe gjasat për të arritur një marrëveshje. Ky është momentumi i ri që duhet ta shfrytëzojmë.”

Duke kopjuar politikën e Tiranës me një arrogancë të Edi Ramës dhe injorancë të Ilir Metës, Presidenti Hashim Thaçi ndërsa foli për ftesën e kryeministrit Albin Kurti për t’u takuar rreth koordinimit për politikë të jashtme tha se në ditët në vijim do t’i takojë të gjithë liderët e partive politike, duke përfshirë edhe liderin e Vetëvendosje dhe LDK-së.

“Do t’i ftoj për shkak të epopesë së UÇK-së, në ditët e ardhshme për t’i takuar. Do të takoj edhe liderin e LVV-së, LDK-së, të gjithë.”