Nuk i duhet më rilindjes, KPA shkarkon prokuroren Donika Prela

Kolegji i Posaçëm i Apelimit, KPA, shkarkon nga detyra ish-drejtuesen e Krimeve të Rënda, prokuroren Donika Prela. KPA tha se Donika Prela nuk justifikon dhe ka fshehur pasurinë, si dhe ka kryer deklarim të pasaktë.

Në seancën e 11 Shtatorit kur Kolegji i Posaçëm i Apelimit vendosi të mbyllë hetimin gjyqësor të çështjes për rivlerësimin kalimtar të ish-drejtueses së Prokurorisë për Krime të Rënda, vetë Donika Prela e kuptoi se nuk i duhet më rilindjes dhe nuk ishte e pranishme sot në seancë kur u shpall vendimi.

Ndryshe, Donika Prela u konfirmua në detyrë në shkurt të vitit 2019 nga Komisioni i Pavarur i Kualifikimit, pavarësisht problematikave të shumta dhe akuzave ndaj saj që nxori në pah seanca dëgjimore.

Ndërkohë në prill të vitit të kaluar, Komisioneri Publik i kërkoi Kolegjit të Posaçëm të Apelimit shkarkimin e saj, duke e argumentuar me mosjustifikimin e një pjese të pasurisë.