Nuk i kujtohet viti ’96, Shefja e Misionit të OSBE-ODIHR vjen të vëzhgoj zgjedhje pa opozitë

Shefja e Misionit të Vëzhguesve të OSBE-ODIHR-it, Adry Glover gjatë prezantimit të ekspertëve për procesin e ardhshëm elektoral tha se nuk i kujtohet viti 1996 kur nuk u pranuan zgjedhjet, por kjo nuk e pengon që të monitoroj zgjedhje që për dallim nga ato zgjedhje që i janë shlyer nga kujtesa, nga opozita ka kohë që është paralajmëruar bojkotimi i zgjedhjeve të 30 Qershorit.

“Nuk i mbaj mend me skatësi në fakt ato të 1996, sepse ka kaluar shumë kohë, por le të koncentrohemi tek këto zgjedhje dhe të mos bazohemi se çfarë ka ndodhur më parë. Çdo zgjedhje është e ndryshme, edhe brenda një vendi nuk mund të krahasohen dy palë zgjedhje,” tha Glover edhe pse e pranon:

“Nuk kam marrë kurrë pjesë në vëzhgim të  zgjedhjeve ku opozita nuk ka marrë pjesë në zgjedhje…”

Ndërkohë nuk ka komentuar vendimin e djeshëm kriminal të KQZ-së për të mos regjistruar anëtarët e PD dhe LSI në Komisionet Zonale të Administrimit të Zgjedhjeve:

“Tani nuk mund të themi asgjë, siç thash ne do të vëzhgojmë dhe do të raportojmë çfarë shohim!”

Në kushtet kur vëzhguesit lokalë nuk do të jenë nga opozita, e cila nuk po merr pjesë sepse thotë se qeveria i blenë votat dhe i kërcënon qytetarët, Shefja e Misionit të OSBE-ODIHR-it u pyet se si do të mbahet nën vëzhgim kjo situatë:

“Do ta mbajmë gjithnjë një sy hapur për të parë, për shitblerje apo kërcënime. Sa u përket vëzhguesve, mirë do të ishte nuk do bënte dëm të kishim më shumë, por nuk është gjithnjë e lehtë…Doja të përmendja se në të njëjtën kohë zhvillohen edhe zgjedhje të tjera, megjithatë ne do të jemi profesionistë.”

E pyetur nëse do të çertifikoj këto zgjedhje pa opozitën dhe si do të pagëzohet ky proces elektoral, Shefja e Misionit të OSBE/ODIHR ishte në sinkron me qëndrimet e Prezencës në Tiranë, në shërbim të Edi Ramës:

“Unë do raportoj se çfarë kemi parë në këto zgjedhje siç kemi bërë gjithnjë, ne reflektojmë në çdo gjë që shohim dhe më pas nxjerrim raportin”.