Nuk i organizon VV, Kurti: Nuk mund t’i ndalë protestat qytetare!

Thirrjet në rrjetet sociale për protesta më 4 dhe 5 maj, Kryeministri në detyrë Albin Kurti tha se nuk mund t’i ndalojë qytetarët të shprehen, por saktësoi se si Lëvizja Vetëvendosje nuk ka organizuar ndonjë protestë.

Kosova është në një situatë pandemie dhe duhet të respektohen vendimet e Ministrisë së Shëndetësisë, tha Albin Kurti, ashtu si dhe këshillat e mjekëve dhe ekspertëve të Institutit Kombëtar të Shëndetësisë Publike.

“Duhet ta kuptojmë që nuk është viti 1990 kur ndaloheshin protestat, por është vitit 2020. Unë nuk jam këtu që t’i ndaloj protestat e qytetarëve, por jam që t’iu shërbej sipas programit tonë, duke u përqendrua në luftimin e pandemisë COVID-19. Rrjetet social, nuk është se kam kohë t’i përcjell dhe nuk e di kush çfarë thirrjesh bënë. Por, subjekti politik, Lëvizja Vetëvendosje ku unë jam kryetar nuk e ka organizuar atë protestë,” tha Kryeministri Kurti duke shtuar:

“Protesta nuk është monopol i Lëvizjes Vetëvendosje. Sa të ketë qytetari e popull do të ketë protesta. Unë si kryeministër nuk jam këtu që të merrem as me protesta dhe as me ata që i thërrasin dhe i organizojnë ato. Por me Kushtetutë e me Ligj, e me program t’iu shërbej qytetarëve çdo ditë,” tha Kryeministri i Kosovës duke sqaruar se nuk nuk mund t’i ndalë qytetarët të protestojnë, sepse siç tha, nuk është kryetar diktator.

“Unë nuk jam një kryetar diktator I cili u thotë anëtarëve se çka duhet të thonë e të bëjnë. Subjekti ynë është më demokratik në vend, I tillë është edhe për nga statuti dhe për nga praktika. Ne nuk I bëjmë rresht aktivistët që të mendojnë njësoj e të shpreh njësoj e të veprojnë njësoj. Qëndrimin e VV-së e përcakton Këshilli i Përgjithshëm, kryetari I subjektit dhe Kryesia. Ne i kemi 50 mijë anëtarë, nëse unë do merresha se çka thotë secili aktivist, prej tyre ka mundësi që më shumë se gjysma janë në rrjete sociale, atëherë nuk të më ngelej punë për të bërë për shkak të kohës që se kam këtu në kryeministri.”

Për pakon emergjente, Kryeministri Albin Kurti tha se do t’i rishikojnë kushtet për vazhdimin e masave ndërsa për faturat e shumëdebatuara të energjisë elektrike të serbëve në veri ai sqaroi me KOSST-in dhe Ministrinë e Ekonomisë po përgatisin edhe fillimin e faturimit në veri.