Nuk ka amnisti, Kurti: Manipuluesit e votave duhet të ndëshkohen!

Ndërkohë që ka përfunduar rinumërimi i votave për kandidatë në zgjedhjet e 28 dhjetorit në 21 komuna, dhe Prokruroia vazhdon intervistimet e të dyshuarëve për manipulimin e votave, sot Kryeministri në detyrë i Kosovës, Albin Kurti, tha se manipuluesit e votave duhet të ndëshkohen ndërsa u zotua se nuk ka amnisti për ta.

“Komisionerë e individë që në mënyrë klandestine janë përfshirë në manipulime votash brenda subjekteve politike duke dëmtuar kolegë e subjekte politike nuk kanë amnisti. I inkurajojmë institucionet përgjegjëse që hetimet të shkojnë deri në fund,” tha Albin Kurti në reagimin e tij përmes rrjetin social Facebook duke theksuar se Lëvizja Vetëvendosje ka qenë gjithnjë gardiane e ruajtjes së vullnetit politik të shprehur përmes votës në kuti të votimit dhe ashtu do të qëndrojë përherë.

“Republika e Kosovës është shembull i demokracisë në rajon dhe i proceseve zgjedhore. Adresimi përmes ligjit dhe llogaridhënies për rastet e dyshimeve të manipulimeve brenda subjekteve politike, është i domosdoshem për integritetin e procesit,” tha Kryeministri në detyrë, Albin Kurti në reagimin e tij duke përfunduar:

“Vullneti i qytetarëve është i shenjtë, vota është e lirë, dhe kjo do të garantohet deri në fund. Dyshimet duhet të hetohen, manipuluesit duhet të ndëshkohen, këto raste nuk duhet të na shfaqen kurrë më në të ardhmen.”

Ndryshe, dje Kryeprokurori i Prokurorisë Themelore në Prizren, Petrit Kryeziu, tha të premten se 109 persona janë ndaluar për 48 orë nën dyshimet për keqpërdorim të votave të zgjedhjeve të parakohshme të 28 dhjetorit, ndërsa sot me autorizim të Prokurorisë Themelore në Gjakovë, Policia e Kosovës ka nisur veprime hetimore në Komunën e Malishevës lidhur me dyshimet për manipulim të votave gjatë procesit zgjedhor.