Nuk ka humbur asnjë fond, Kurti: S’ka dëmtim të raporteve me SHBA!
Kryeministri i Kosovës, Albin Kurti, tha se marrëdhëniet me SHBA nuk qëndrojnë të varura nga një pe që mund të shkëputet.
Duke sqaruar nga foltorja e Parlamentit të Kosovës, Albin Kurti tha se nuk ka humbur asnjë fond nga projektet e MCC-së për energjinë, dhe se frika dhe paniku për prishje të marrëdhënieve me SHBA janë të pavenda. Dhe jo vetëm kaq! Në seancën plenare ku po debatohet për projektin e gazsjellësit, Kurti tha se nëse viti i ka 52 javë, ai takohet 52 herë në vit me Ambasadorin amerikan në Kosovë.
“Nuk na kanë humbur asnjë fonde dhe s’ka dëmtim të raporteve me SHBA-në. Frika dhe paniku i tillë janë të pavend, s’ka nevojë askush t’i ketë dhe t’i shpreh publikisht t’i përcjell te të tjerët. Unë së paku një herë në javë e takoj ambasadorin amerikan. Sot kam takim po ashtu, nëse viti i ka 52 javë, unë e takoj 52 herë në vit. Rregullisht jemi në kontaktet me gjitha temat. Nuk është as aleanca dhe as partneriteti me SHBA dhe sigurinë kombëtare në njërën anë dhe as ai ekonomik dhe zhvillimor në anën tjetër i varur në pe. Nuk qëndron partneriteti jonë i varur për një pe që tash mund të shkëputet shumë shpejt. Prandaj ju lus të gjithë të keni më shumë besim në aleancën dhe partneritetit me SHBA-në.”
Për tre juristë që ishin më energjikët për debatin për energjinë, Kryesministri i Kosovës tha se morën leksion nga ministrja e Ekonomisë, Artane Rizvanolli.
“Sot ka marrë një leksion të mirë profesoresha e ekonomisë, kjo është shpresëdhënëse për emancipimin. Më energjikët për debatin për energjinë ishin tre juristë dhe ishte shumë bukur si tre studentë të juridikut morën një leksion nga profesoresha e ekonomisë. Jo vetëm që morën leksionin, por kërkuan t’i zgjatet fjala asaj. Mund ta parashikoj si përfundon kjo, në fund të semestrit tre studentë të juridikut do ta admirojnë profesorin e ekonomisë,” tha Kryeministri Albin Kurti duke sqaruar përfundimisht se granti i MCC është ndarë për investime të tjera.
“Granti deri në 120 milionë euro nuk është ndarë specifikisht vetëm për infrastrukturë gazi, ndonëse ky opsion ka qenë duke u studiuar. Ne kemi vendosur që grantin ta shpenzojnë për investime të tjera. Qeveria e Kosovë nuk i ka vënë kushte MCC për sa i përket këtij projekti dhe as MCC nuk i ka vënë kushte Qeverisë. Pra ka qenë raport partneriteti pa kushtëzime. Partneriteti i tillë i ngushtë vazhdon duke i trajtuar çështjet edhe si dizajn taksni e fizibilitet ekonomik. Qeveria e Kosovës thjeshtë e ka vlerësuar me kujdes projektin dhe ndikimin në çmimin e energjisë.”
