Nuk ka interpretim shqiptar për imunitetin, Berisha mesazh partnerëve: Ky është një mashtrim!

Nuk ka interpretim shqiptar për imunitetin, ishte mesazhi për partnerët i Kryetarit të Partisë Demokratike, Sali Berisha, i cili e cilësoi sot një mashtrim ndërsa Edi Rama tha se është pengmarrësi më i madh i Shqipërisë.

Duke e komentuar Raportin e IBAR për integrimin, Kryetari i Partisë Demokratike tha sot se Shqipëria mbeti në klasë pasi një seri vendesh anëtare të BE nuk e votuan.

“Sot, Edi Rama është pengmarrësi më i madh pas Enver Hoxhës në histori, pengmarrësi më i madh i Shqipërisë. Zhvillime dramatike vijnë për procesin e integrimit të Shqipërisë.

Raporti IBAR mbeti në klasë pasi një seri vendesh anëtare të BE nuk e votuan, por shtruan një seri çështjesh themelore dhe unë jam këtu të falënderoj, të shpreh mirënjohje ndaj këtyre vendeve, të cilat insistojnë që procesi i integrimit të jetë një proces i bazuar në meritë.
Sepse ky proces i bazuar në meritë është interesi absolut më i mirë i qytetarëve shqiptarë.
Procesi jashtë meritës është ndëshkim për qytetarët shqiptarë dhe mbështetje për kusarët qeveritarë shqiptarë.
Ndaj dhe dua të falënderoj një seri vendesh të BE, të cilat dora-dorës po e kuptojnë se Edi Rama dhe narkoregjimi i tij nuk plotësojnë asnjë kusht, asnjë kriter, asnjë standard për integrimin e Shqipërisë në BE.
Sepse Shqipëria e Edi Ramës është një piramidë madhore mashtrimi.
Sepse Edi Rama e ka shndërruar Shqipërinë në çifligun e vet për ta vjedhur dhe për t’u pasuruar në mënyrë të çmendur.
Ndaj dhe jam këtu për të deklaruar se për PD, objektivi më madhor i saj është integrimi i bazuar në meritë.
Pra, edhe njëherë qytetarëve shqiptarë, njeriu që për muaj të tërë nxirrte nga xhepi një pasaportë false kallpe dhe u thoshte kjo është pasaporta evropiane që u garantoj unë, e ndërroi dhe nxjerr pasaportën e Beogradit, pasaportën e Vuçiçit. Ky është zhvillimi dramatik sepse ai mbron vjedhjet e tij,” tha Sali Berisha ndërsa ju drejtuar partneëve lidhur me imunitetin e Ballukut:

“Dhe një gjë njerëzisht duhet t’u them partnerëve tanë se cilido që u thotë ju të nderuar miq dhe të dashur se çështja e imunitetit të Ballukut është sipas interpretimeve shqiptare, është një mashtrues i paguar ose i papaguar nga Edi Rama.
Sepse standardet shqiptare të imunitetit kanë qenë në qeverinë paraardhëse, heqje e çdo imuniteti të kërkuar nga prokuroria e përgjithshme. Dorëzim edhe paraprak, pa u kërkuar nga prokuroria, për hetimin.
Dhe interpretimi shqiptar i imunitetit, ua them atyre që pretendojnë me këtë deklaratë të turpshme, ka qenë interpretim kushtetues dhe ligjor.
U hoq imuniteti i Ilir Metës dhe ka dhënë dorëheqjen. Është hequr imuniteti i Fatmir Mediut. Është hequr dy herë imuniteti i Lulzim Bashës. Të gjitha këto të kërkuara nga një prokurore e përgjithshme e verbër.
Por natyrisht kjo nuk mundej kurrë, në standardin shqiptar dhe interpretimin shqiptar, i them atij që paraqet këtë argument dhe i falënderoj ata që nuk ia besuan por e hodhën poshtë me përçmim, të vërtetat janë këto, ky është imuniteti i hajdutëve që paguajnë lobistët.
Ky është interpretimi i hajdutëve, mbrojtja me imunitet i vjedhjeve është interpretim i Edi Ramës, kreut të organizatës kriminale dhe ministrave të tij, deputetëve të tij.
Nuk është standard shqiptar ky. Nuk është interpretim shqiptar ky. Por i hajdutëve armiq të kombit shqiptar si Edi Rama me ministrat e tij.

Në fund, Kryetari i Partisë Demokratike foli dhe për Ergys Agasi, i cili tha se është parë duke shkuar në Surrel, dhe së shpejti do t’i hiqet edhe masa e arrestit.

“Vazhdon qarkullimi i Ergys Agasit, i lirshëm fare, dhe sipas qytetarit dixhital, ai është parë me makinën e tij, jo në eskortën e Edi Ramës siç ka qenë përpara, por është parë në një rrugë duke shkuar në Surrel, duke u ngjitur përpjetë.
A fshihet ai në Surrel apo shkoi për një takim në Surrel, këtë nuk mund ta them.
Por u them me siguri se Ergys Agasi, që së shpejti do i hiqet masa e arrestit, sepse Edi Rama me Sokol Sadushin e çliroi Agasin nga masa e arrestit si person nën hetim.
Nuk ka më masë arresti për Agasin kështu që gjithçka po shkon drejt konsolidimit të narkoregjimit dhe janë vetëm shqiptarët, qytetarët shqiptarë që do marrin fatin në duart e tyre,” tha Kryetari i Partisë Demokratike, Sali Berisha, duke përfunduar:
“22 Marsi është dita e kryengritjes më të fuqishme paqësore që ka njohur Shqipëria në tërë historinë e saj.
Ndaj dhe ftoj çdo shqiptar në rrugët dhe sheshet e Tiranës të tregojmë revoltën, zemërimin, përçmimin tonë ndaj këtij regjimi.”