Nuk ka më paqe, Berisha: Largimi i Edi Ramës, kushti i të gjitha kushteve!

Kur Kryetarja e Parlamentit, Lindita Nikolla, mendoi se realizoi me sukses misionin e përcaktuar nga Kryeministri Edi Rama duke mos i dhënë fjalën opozitës dhe duke e larguar liderin e saj Sali Berisha nga seanca, vetë Kryetari i Partisë Demokratike pas fjalës në parlament dha edhe një mesazh të prerë jashtë godinës së Kuvendit, duke e bërë të qartë se ky institucion nuk zhvillon më punime pa u ndalur te “Skandali McGonigal” që ka tronditur Shqipërinë, nuk ka më paqe në këtë vend dhe largimi i Edi Ramës është kushti i të gjitha kushteve.

“Sot, parlamenti ka ditën e turpit, ditën e fundit. Parlamenti refuzon kërkesën më legjitime për t’i kushtuar rendin e ditës një çështje që ka tronditur gjer në palcë vendet e lira.

Imagjinoni ju se në çfarë afere është e implikuar Shqipëria.

Imagjinoni ju se si ky kryeministër ka vënë në rrezik sigurinë e SHBA, sigurinë e NATO-s, sigurinë e botës së lirë.

Imagjinoni ju një vrasës me pagesë që merr para nga kryeministri për të vrarë opozitën shqiptare. Ne këtë nuk e kalojmë.

Edi Rama është sot, njeriu më i inkriminuar në Europë dhe më gjerë.

Unë kam bindjen më të thellë, se drejtësia amerikane do të thotë fjalën e saj ndaj këtij krimineli.

Por para saj duhet të flasin shqiptarët, duhet të flasë parlamenti, duhet të flasin qytetarët,” tha Sali Berisha duke e konsideruar situatën në të cilën ndodhet, më të pazakont se kurrë më parë.

“Edi Rama, me dy bashkëpunëtorë, ka trajtuar si aset privat, shefin e kundërinteligjencës së FBI, njeriun përgjegjës për të zbuluar, vëzhguar dhe ndjekur rrjetet e spiunazhit në SHBA, por edhe në emër të vendeve të tjera.

Jemi në situatën më të pazakontë që kemi qenë ndonjëherë si vend. Vetëm një betejë e gjithanshme është shpëtimtare për Shqipërinë.

Edi Rama ka përdorur McGonigal si vrasës me pagesë për të manipuluar, falsifikuar, trilluar kundër opozitës shqiptare.

Kjo përbën një mega-krim, një krim ndërkombëtar, për të cilin ne do kërkojmë nga autoritetet amerikane që t’i japin dënimin më të rëndë,” tha Kryetari i Partisë Demokratike duke shtuar se sot që flasim, Deripaska është një nga kompanitë më prezente në Shqipëri.

“Është një nga kompanitë me të cilat ka përfituar statusin e investitorit strategjik, ka përfituar koncesione, ka përfituar tendera nga Fondi Shqiptar i Zhvillimit.

Deripaska është miku numër një i Vladimir Putinit, rekrutuesi me korrupsion i Charles McGonigal.
A u takua Rama, McGonigal dhe Deripaska? A drekuan apo darkuan së bashku? Këto do i sqarojë drejtësia. Por një gjë është e sigurt, se Edi Rama me të gjitha qëndrimet e tij, del agjent influent rus.
Edi Rama nuk ishte i verbër, nuk ishte pa eksperiencë. Veprimet e tij me McGonigal i ka bërë për llogari të asaj fuqie të NATO-s dhe SHBA. Edi Rama nuk ka fshehur në asnjë rast qëndrimet e tij pro-ruse duke mbrojtur qëndrimet e Vuçiç ndaj embargos ruse,” tha Kryetari i Partisë Demokratike, Sali Berisha duke përfunduar:

“Ne jemi këtu për të deklaruar se ky parlament nuk zhvillon më punime pa u ndalur te spektri i kësaj afere të tmerrshme që ka tronditur Shqipërinë dhe ka goditur rëndë në opinionin publik amerikan dhe botëror.
Nuk ka më paqe në këtë vend pa u zgjidhur këto probleme. Largimi i Edi Ramës është kushti i të gjitha kushteve.”