Nuk kemi raste me virusin anglez, Komiteti Teknik: Masat kufizuese mbeten në fuqi!
Situata e epidemisë paraqitet e qëndrueshme në dy javët e fundit, tha sot Komiteti Teknik i Ekspertëve por pavarësisht shenjave pozitive, masat kufizuese kundër koronavirusit do të vijojnë të mbeten në fuqi.
“Nuk kemi të dhëna të plota për praninë e virusit anglez në Shqipëri. Ne mendojmë që në këtë situatë të vazhdojnë të mbajmë në fuqi orën policore, universiteti të vazhdojë online edhe për dy javë. Fluturimet me Britaninë të mbeten të pezulluara deri më 18 janar,” tha kreu i Komitetit, Mira Rakacolli.
Shefi i Urgjencës Kombëtare, Skënder Brataj, situatën nga koronavirusi e vlerësoi të qëndrueshme.
“Situata tashmë paraqitet më e qëndrueshme, por të ardhmen nuk mund ta dimë. Mjekët kanë bërë shumë vizita në banesa. Veç kësaj, do të mbajmë akoma në dispozicion numrin jeshil. Ne do të jemi gjithmonë në dispozicion. Në këtë moment, kemi burimet akoma më të forcuara”, tha Brataj.
Ndërsa Drejtorja e ISHP, Albana Fico u shpreh se vetëm javën e fundit incidenca është ulur në 110 raste të reja për 100 mijë banorë.
“ Situata epidemiologjike në vend, është vlerësuar në mënyrë dinamike gjatë gjithë pandemisë dhe specifikisht gjatë periudhës së festave të fundvitit. Vetëm gjatë javës së fundit, niveli i incidencës është ulur lehtësisht dhe është në vlerën në 110 raste të reja për 100 mijë banorë.
Për dy javët e fundit, incidenca e rasteve me covid-19 në Shqipëri mbetet në 227 raste për 100 mijë banorë, krahasuar me dy javët pararendëse. Koha që marrin në shqyritm janë 23 dhjetor – 5 janar. Niveli i pozitivitetit është mesatarisht 22% krahasuar me totalin e mostrave të testuara gjatë javës së fundit. Mosha mesatare e rasteve të konfirmuara është 48.7 vjec dhe intervali është nga 2 muaj deri në 98 vjec. Vendin më të rëndësishëm të rasteve të konfirmuara e zë grupmosha, 55-64 vjec vjeç e ndjekura nga 25-34 vjec dhe 45-54 vjec.
E sjellim në mënyrë të vecantë përqindjen e grup moshave sepse ka një rritje në grup moshat 25-34, ku apelojmë të mos grumbullohen. Nga vlerësimi i incidencës sipas qarqeve në vend, Gjirokastra është në fillim e ndjekur nga Tirana më pas nga Lezha,” tha Dr.Fico duke përfunduar:
“Situata për këto dy javë mbetet e qëndrueshme, me zbritje të lehta që janë për t’u parë në vijimësi. Nuk ka vend për vetëkënaqësi, duhet të jemi të ndergjegjshëm që jemi akoma në një situatë me transmetueshmëri të lartë. Jemi në pikën ku duhet të jemi tepër të kujdesshëm në zbatimin e masave, mbajtjen e maskës, ruajtjen e distancës dhe masat e tjera të përcaktuara. Masat kanë kontribuar në këtë situatë të qëndrueshme.”
