Numërohen rreth 80 për qind e votave me kusht, kryeson LVV

Komisioni Qendror i Zgjedhjeve, KQZ, është drejt përfundimit të numërimit të votave me kusht nga zgjedhjet parlamentare të 9 shkurtit në Kosovë.

Sipas përditësimit të fundit në web-faqen e KQZ-së të mëngjesit të sotëm, janë numëruar 78.57 për qind e votave me kusht.

Lëvizja Vetëvendosje ka fituar 40.21 për qind, apo 2.634 vota me kusht.

E dyta është Partia Demokratike e Kosovës me 18.11 për qind, apo 1.186 vota, pasuar nga Lidhja Demokratike e Kosovës me 13.54 për qind, apo 887 vota, Lista Srpska me 11.37 për qind, apo 745 vota, dhe Aleanca për Ardhmeninë e Kosovës dhe Nisma me 6.21 për qind, apo 407 vota.

Numërimi i votave me kusht dhe i personave me aftësi të kufizuara nisi dje, në ditën kur përfundoi numërimi i votave me postë, dhe pritet të përfundojë sot, sipas zyrtarëve të KQZ-së.

Zyrtarë të KQZ-së kanë thënë se procesi i numërimit të votave pritet të përfundojë sot më 5 mars.

Me rezultatet e tanishme, që përfshijnë edhe votat në vendvotimet në Kosovë, ato në përfaqësitë diplomatike dhe me postë, asnjëra parti nuk ka siguruar numër të mjaftueshëm për të qeverisur e vetme.

Për të pasur shumicën, duhen së paku 61 deputetë në Parlamentin me 120 ulëse të Kosovës.

Si partia e parë, Vetëvendosje ka aktualisht 48 mandate.

Udhëheqësi i saj, kryeministri Albin Kurti, është zotuar se do ta formojë qeverinë në mënyrë të pavarur.

Partitë aktualisht në opozitë, përveç Nismës, e kanë përjashtuar mundësinë e koalicionit me të.

KQZ pritet që javën e ardhshme të certifikoj rezultatet./RFE/