Numri i të huajve që jetojnë në Shqipëri arrin rekord, rritje nga India, Filipinet dhe Egjipti

Në vitin 2025 rezulton se ka pasur rritje të ndjeshme të numrit të shtetasve të huaj me leje qëndrimi që jetojnë e punojnë në Shqipëri.

Deri në fund të vitit 2025, numri i të huajve me leje qëndrimi në Shqipëri arriti në 27.514 banorë sipas të dhënave të Regjistrit Elektronik për të Huajt, FER, dhënë për Monitor nga Policia e Shtetit, duke shënuar një nivel rekord. Pjesa më e madhe e tyre, rreth 65 për qind janë për arsye pune dhe rreth 15 për qind për bashkim familjar.

Në raport me 2024 numri i shtetasve të huaj të pajisur me leje qëndrimi u rrit rreth 4.800 banorë apo 22 për qind.

Nga totali prej 27,514 lejesh qëndrimi aktive deri në fund të vitit 2025, shumica e të huajve janë nga Kosova dhe Italia.

Numri i shtetasve nga Kosova të pajisur me leje qëndrimi arriti në 6.076 banorë, që përbën rreth 22 për qind të totalit. Krahasuar me 2024 numri i tyre u rrit 32 për qind.

Ndryshe nga shtetasit e tjera, banorët nga Kosova pajisen me leje qëndrimi me afat 5- vjeçar.

Pas Kosovës numrit më të lartë të shtetasve të huaj të pajisur me leje qëndrimi është nga Italia me 3,776 persona që përbëjnë 14 për qind të totalit të të huajave. Krahasuar me 2024 numri i tyre u rrit 75 për qind.

Krahas Italisë e Greqisë, që tradicionalisht kanë kryesuar për leje qëndrimi, një rritje e ndjeshme në 2025-n është shënuar nga shtetasit nga India dhe Filipinet e Egjipti, që janë ngjitur përkatësisht në vend të tretë, të katërt e të pestë.

Numri i shtetasve nga India në 2025 arriti në 2.399 apo 47 për qind. Shtetasit nga India përbënë 14% të totalit të huajve të pajisur me leje qëndrimi. Këta punojnë kryesisht në shërbime dhe teknologji informacioni.

Shtetasit nga Filipinet të pajisur me leje qëndrimi në 2025 janë 2.213 persona apo 130 për qind më tepër sesa 2024. Këta shtetas punojnë kryesisht në shërbimet shtëpiake dhe në hotele e restorante e më pak në fason.

Për 2025 numri i shtetasve të huaj nga Egjipti ishte 2,007 persona apo rreth 2 herë më shumë sesa në 2024 dhe punojnë në sektorë të ndryshëm, deri në bujqësi. Ata përbënë 7 për qind të totalit të të huajve në 2025.

Numri i shtetasve nga Turqia ishte 1.862 persona apo përbënë 7 për qind të totalit në 2025. Në raport me 2024 numri i tyre u rrit rreth 47 për qind.

Nga i shtetasve të huaj nga SHBA arriti në 1.128 banorë apo 164 për qind më shumë sesa në 2024.

Nga ana tjetër Miamare ka 445 persona, 2 për qind të totalit apo 77 për qind më shumë sesa në 2024.

Numri i shtetasve nga Kina arriti 362 persona apo 42 për qind më shumë sesa në 2024.

Numri i shtetasve të huaj nga Nigeria arriti 184 persona për vitin 2025.

Aplikime të reja për 2025, kryesohen nga shtetasit indianë dhe filipinas

Gjatë vitit 2025, sipas Regjistrit Elektronik për të Huajt, FER, janë përpunuar gjithsej 19.321 aplikime për leje qëndrimi, që tregon një rritje të dukshme krahasuar me 13.176 aplikime që u përpunuan gjatë vitit 2024. Krahasuar me vitin 2024 numri i tyre me 6.145 aplikime me apo 47 për qind më shumë.

Gjatë vitit 2025, shtetësitë kryesore që kanë aplikuar për herë të parë për leje qëndrimi është India me 2.691 aplikime, që përbën 14 për qind të totalit, Filipinet me 2.415 aplikime 13 për qind, Italia me 2.239 aplikime 12 për qind, Egjipti me 2.198 aplikime 11 për qind, Kosova me 1.813 aplikime 9 për qind, Turqia me 1.441 aplikime 7 për qind, SHBA me 606 aplikime 3 për qind, Mianmar me 506 aplikime 3 për qind, Rusia me 442 aplikime 2 për qind dhe Ukraina me 312 aplikime 2 për qind.

65% e aplikimeve të reja për punësim

Megjithatë motivi kryesor për pajisjen me leje qëndrimi në Shqipëri vijon të mbetet për çështje punësimi dhe bashkimi familjar.

Për vitin 2025, nga totali i aplikimeve të reja 65 për qind e tyre ishin për leje unike punësimi, e ndjekur nga aplikimet për bashkim familjar që përbënë 13 për qind apo rreth 5 për qind e tyre ishin për qëllime studimi. Ndërsa numri i shtetasve të huaj që aplikuan për leje të përhershme qëndrimi ishte 40 apo duke përbërë 0.2 për qind të totalit të numrit të aplikimeve për 2025.

Nga totali i aplikimeve për 2025, sipas të dhënave 7.049 apo 36.4 për qind prej tyre janë aplikime nga femra dhe 12.272 apo 63.6 për qind nga meshkuj./Monitor/