“Nxirja e luftës”/ Çertifikon linçimin, Edi Rama kërcënon Institutin dhe Agron Tufën!

Linçimin ndaj Institutit të Krimeve dhe Pasojave të Komunizmit dhe Agron Tufës e filloi në qiell të hapur Spartak Braho dhe u krijua ideja pa asnjë shkas, por, sot, kryeministri Edi Rama e zbuloi se me porosinë e kujt u linçua titullari i Institutit.

Si gjithmonë konfuz, Edi Rama ashtu si edhe Stalini i fal krimet e komunistëve që janë bërë deri më 29 Nëntor 1944 ndërsa arsyeton ceremoninë për Mit’hat Frashërin ndonëse Instituti i Krimeve dhe Pasojave të Komunizmit u konsiderua nga sejmenët e tij si “seksion i Ballit Kombëtar” ndërsa shtoi se nuk i beson historisë së shkruar nga fitimtarët.

Duke folur për debatin që po zhvillohet rreth veprimtarisë së Institutit të Krimeve dhe Pasojave të Komunizmit, kryeministri Edi Rama, gjatë një takimi me veteran  tha se çfarë ka ndodhur përpara 29 Nëntorit 1994 nuk mund të jetë kurrë objekt i një Instituti që paguhet nga taksat e shqiptarëve.

Dhe, duke mos i besuar historisë së shkruar nga fitimtarët, ashtu si pjesa më e madhe e shqiptarëve, Edi Rama akuzon Institutin e kryesuar nga Agron Tufa që sjellë edhe dëshmi të gjalla, të atyre që kanë vuajtur nga kriminelët komunist që kishin bërë krime para dhe pas 29 Nëntorit të famshëm 1944.

“Unë do ta bëja prapë, njësoj ceremoninë për Mit’hat Frashërit. Jo sepse unë kam ndonjë dilemë lidhur me kufirin që ndan qartësisht patriotët nga bashkëpunëtorët e nazizmit, por unë nuk i besoj historisë së shkruar nga fitimtarët.

I besoj domosdoshmërisë që ne ta kapërcejmë atë histori duke mos rënë kurrë në grackën e asnjë rehabilitimi të bashkëpunëtorëve të fashizmit dhe nazizmit si dhe duke mos lejuar atë që me të drejtë u tha këtu që në emër të studimeve të krimeve të komunizmit të cenohet një fije floku cilitdo që mori armën për të luftuar nazistët dhe fashistët.

Qëndrimi im është shumë i qartë. Çfarë ndodhi dhe si ndodhi deri më 29 nëntor 1944 nuk mund të jetë kurrë objekt i një instituti që paguhet nga taksat e shqiptarëve,” tha Edi Rama duke harruar se këtu bëhet fjalë për krimet e komunistëve ndaj shqiptarëve, meqenëse nuk do të ishte keq të zbulohen edhe krimet ose ligjet e luftës që janë shkelur edhe ndaj gjermanëve. Dhe jo vetëm kaq!

“Çfarë erdhi pas ka qenë objekt i punës së atij Instituti dhe i takon Kuvendit të Shqipërisë të bëjë të gjitha vlerësimet e nevojshme në raport me ligjin apo shkeljen e ligjit, në raport me dobinë apo dëmin e shkaktuar nga një institut i tillë,” tha Edi Rama duke i dhënë fund hamendësimeve se ç’pat Spartak Braho që sulmoi Institutin dhe Tufën, dhe më pas u vërsulën një bandë e tërë komunistësh për të përdhosur punën e Institutit të Krimeve dhe Pasojave të Komunizmit dhe titullit të saj Agron Tufa duke e akuzuar për “nxirje të luftës”.

Ndryshe, në fillim të muajit Prill, deputeti i Partisë Socialiste, Spartak Braho duke akuzuar në Komisionin Parlamentar të Sigurisë, Drejtorin e Institutit të Studimeve për Krimet dhe Pasojat e Komunizmit, Agron Tufa, zbulimin e krimeve të komunizmit nga ky Institut e konsideron “nxirje të luftës, heronjëve dhe dëshmorëve” ndërsa vetë Institutin “seksion të Ballit Kombëtar”. Për këtë arsye, ai kërkoi “shkarkimin e Agron Tufës derisa t’i thërrasë mendjes e të jetë më i ekuilibruar në veprimtarinë e tij.” Pas kësaj shfaqje parlamentare historianë dhe jo vetëm në shërbim të Edi Ramës, filluan një fushatë linçimi e cila fillonte nga Zyra e Agron Tufës në Institut e deri tek tavolina e bukës në shtëpinë ku jeton Drejtori i Institutit të Studimeve për Krimet dhe Pasojat e Komunizmit.