O Dovlet, more Dovlet!
nga Agim Popoci
O Dovlet, more Dovlet,
Vit për vit po na thërret…
Këto janë fjalët e para të këngës së njohur shqipe që të bien ndër mend kur para syve të del Garda e Presidentit të Turqisë, Recep Tayyip Erdogan për të pritur Kryeministrin Edi Rama ndonëse jo vit për vit, por zgjedhje për zgjedhje!
Ca jeniçer mediatik të Edi Ramës nxituan ta arsyetojnë vizitën dyditore të Kryeministrit në Turqi, dhe sipas tyre, na paska për qëllim ndërmjetësimin në marrëdhëniet Turqi-Greqi! I habitshëm ky mision i kryeministrit shqiptar që proklamohet nga njerëzit e bordit të televizionit të Spitalit që blenë Spitale, kur një iniciativë e tillë mungoi kur Edi Rama kryesonte OSBE-në, tensionet kishin arritur kulmin, dhe në Ankara nuk u pa as Rama, as Erdogani, as Garda, as kuajt e madje as batonët duke hedhur arsyetime në opinion!
Ca të tjerë u munduan ta relativizojnë këtë performancë të Gardës së Presidentit të Turqisë, duke mos përfillur gjithë atë angazhim dhe nderim ushtarak për Edi Ramën, dhe duke përçmuar intelektin me gjithë ato broçkulla që nxorën nga goja për inat të Ramës!
Por ajo performancë nuk është thjeshtë një nderim ushtarak që mund të ekzekutohet me lehtësi nga një Gardë që numëron 2.500 oficerë, por një performancë të cilën shumë pak burrave të shtetit u ka ofruar Recep Tayyip Erdogan! Dhe, çmimi është shumë i lartë, ose thënë më shkurt:
Performancë që ka kosto!
Rruga e Tiranës në Athinë mund të ketë shumë trajektore por asnjëra nuk shkon nga Ankaraja!
Për ta çuar kufirin në 12 ose 6 milje, njeriu i fundit që mund ta pyet Erdogani është Edi Rama, e për ndërmjetësim as që flitet. Pyetja kryesore që parashtrohet para gjithë kësaj sajdisje është, pse Presidenti i Turqisë i bënë gjithë këto marifete pikërisht në prag të zgjedhjeve, dhe jo vetëm këtyre zgjedhjeve?!
Nëse Putin kërkon dalje në Adriatik me patjetër, Erdogan mund të jetë njëri nga kallauzët duke pasur parasysh dhe afeksionin antiamerikan të Edi Ramës!
Ose, nëse Erdogan mendon të betonoj prezencën e tij në bregdetin shqiptar, në emër të sigurisë rajonale, një spital në Fier, Aeroporti i Vlorës dhe pse jo tuneli për dalje në bregdet, janë një asgjë për Presidentin e Turqisë kundër një favori kaq të madhe strategjik!
Sepse, njeriu që shkatërroi ekonominë, qenien kombëtare, po bëhet gati të shes edhe detin, ka mbetur me kartën e vetme që mund ta përdor në zgjedhjet e 25 Prillit: votën e myslimanëve shqiptarë! E kush më mirë se Baba i Dovletit mund ta ndihmoj, me dëshmi nën sqetull nga zgjedhjet në Bosnje Hercegovinë, Serbi, Maqedoni të Veriut dhe Kosovë: Autostrada, fabrika, xhami, shkolla, qendra tregtare e spitale, furnizimin e televizioneve nën kontrollin e pushtetit me seri turke nga më të ndryshmet, për të ndryshuar hartën elektorale në këtë Ballkan të varfër!
Shkronj’ e djallit na u qep.
Na u qep shkronj’ e djallit,
Na mbaroj farën’ e djalit;
Thotë kënga, por edhe djalli na u qep nga zgjedhja në zgjedhje, ndihmoi Edi Ramën të fitoi, e ky i fundit të zbraz vendin duke e bërë të pabanueshëm për nivelin intelektual, si me politika represive ashtu dhe të dështuara që çuditërisht vazhdojnë dhe kanë mbështetjen e garantuar të Erdoganit.
Pas nderimit me Gardën e Presidentit të Turqisë pasoi dhe një performancë me një mori Marrëveshjes, që më e shpifura dhe me të cilën më së shumti mburret Qeveria e Edi Ramës, është premtimi nga pala turke për të krijuar një Shkollë Politeknike në Tiranë.
Shumë marrëzi antishqiptare dhe antiamerikane ka bërë Edi Rama për 8 vjet qeverisje, por kjo është një marrëzi antishqiptare që as vëllait të tij Aleksandar Vuçiç nuk do ti shkonte nëpër mend.
Në 100 vjetorin e themelimit nga amerikanët të Shkollës Profesionale Shqiptare që ndër vite do të njihet si Shkolla Teknike e Tiranës, e cila u bë një institut i klasit të parë nën drejtimin e Harry Trevlin Fultz, dhe sot mbanë dhe emrin e tij, Edi Rama ekzaltohet se Baba Erdogan i premtoi një Shkollë Politeknike në Tiranë.
Arritje e çuditshme: “Tradhtari”, Kryeministër Ahmet Zogu, rritë nivelin dhe arrinë të sjellë dy vjet pas hapjes së shkollës hapur profesionale nga Kryqi i Kuq i të Rinjve Amerikanë, profesorin e Arteve Mekanike në Universitetin e Çikagos, profesorin e mësimeve pasuniversitare në Kolegjin e Arsimit, i diplomuar gjithashtu për shkencat si edhe nga instituti i teknologjisë “Armour”, amerikanin Fultz, ndërsa në vitin 2021 “patrioti” Edi Rama e sjell dhe mburret me arsimin turk në Tiranë!
Për kë e sjellë këtë arsimim Edi Rama, vërtetë është “arritje” me pikëpyetje të frikshme, para se të zbulohet kostoja e kësaj vizite madhështore në Ankara, para se ta votojnë myslimanët shqiptarë Edi Ramën për Kryeministër për hatër të Erdoganit, pasi ai ka bërë që të largohen nga vendi 500 mijë shqiptarë dhe ata që kanë mbetur jetojnë me më pak se 2 dollarë në ditë.
Historia edhe mund të përsëritet ndërsa kënga “O Dovlet, more Dovlet” kështu e përshkruan njërën nga situatat ku me ndihmën e shtetit turk na mbaroi fara e djalit:
Na mbaroj farën’ e djalit;
Mben kopetë shkretë malit,
Po qajnë zonjatë stanit,
Me lot e me djersë ballit.
