Objektivi i PD, Berisha: Krijimi i një elite të aftë, atdhetare!

Objektiv i rëndësishëm i Partisë Demokratike është krijimi i një elite të aftë, atdhetare, tha Kryetari i PD, Sali Berisha, në takim me rrjetin ndërkombëtar dhe atë vendor të Departamentit Brain Gain & Ekselencës, duke vlerësuar se tani është koha që të bashkojmë të gjithë forcat që emigracioni dhe diaspora të votojnë.

“Është një nder shumë i madh dhe të kurorëzoj përpjekjen tonë 1-vjeçare me elitën e rinisë studentore, por jo vetëm rinisë studentore. Me këtë takim, që ka për ne si parti një rëndësi shumë të veçantë.
Për një komb, për një shoqëri, çështja e elitës është çështje kryesore. Krijimi i një elite të aftë, atdhetare, një elite kompetente, përbën pasurinë madhore kombëtare, përbën një objektiv të rëndësishëm të PD-së dhe forcave konservatore.

E vërteta është se në një vështrim të zhvillimeve të dekadave të fundit, dhe më shumë se dekadave të fundit, nëse e majta ekstreme ishte shkatërrimtare e elitave, me program, me projekt, me aktin e parë të marrjes së pushtetit, u vërsuleshin elitave, por koha tregon se në tërësi e majta, mbetet shkatërrimtare e elitave, për shkak të objektivave që ajo përcakton ndaj tyre.

Ju keni vendosur aty një motiv: frytet tona t’ia kthejmë rrënjëve që na kanë ushqyer.

Në këtë slogan qëndron një nga shtyllat më kryesore të konservatorizmit. Është atdhedashuria, është përgjegjësia që çdo njeri i qytetëruar ndjen ndaj kombit dhe vendit të tij.

Dashuria për vendin dhe kombin është më eprorja, më sublimja. Është ajo që i jep një energji pozitive të pashtershme studiuesit, ekspertit, specialistit. Është ajo që shndërrohet në një horizont magnetik që e tërheq,” tha Kryetari i PD i bindur edhe sot se për këtë qeveri, largimi i të rinjve është një lajm i mirë, sepse dobësohet fuqia protestuese dhe votat kundër saj.

Ka një raport jetik midis të ardhmes dhe rinisë. Midis të ardhmes dhe elitës. Në rast se ju vështroni sot shifrat demografike, ato janë tmerrësisht tronditëse.

Një komb që vetëm në hapësirën evropiane, humbet 740 mijë qytetarë, pa llogaritur të tjerë që janë larguar në drejtime të tjerë, jo Shengen.

Në historinë e luftërave, botërore apo civile, nuk gjendet asnjë komb tjetër që ka pësuar këtë katastrofë demografike që ka pësuar kombi shqiptar.

Polonia ka humbur 20 përqind të popullatës në Luftën Botërore. Shqipëria 31 përqind në 7 vite. Kjo jo nga tirania e mjerimit e vitit 1991, kur njerëzit nuk kishin kafshatën, por nga një agresion brutal i krimit, i drogës, i lidhjeve të qeveritarëve me krimin, drogën dhe vjedhjen e qeveritarëve.

Për këtë qeveri, largimi i të rinjve është një lajm i mirë, sepse dobësohet fuqia protestuese dhe votat kundër saj. Për vendin dhe kombin, kjo është absolutisht një katastrofë.

Dy gjëra rrënojnë më shumë se tjetër të ardhmen: mungesa e rinisë. E dyta, borxhi. Edhe borxhi është një barrë e tmerrshme. Kjo qeveri, të dyja po i kryen në mënyrën më pasionante,” tha Kryedemokratike duk eu shprehur qartëse se PD mbështet çdo përpjekje dhe investim në elitën e kombit.

“Ky takim dhe kjo përpjekje e juaja, sado që të duket sikur po i hyni detit në këmbë, mos harroni se misionet të tilla janë.

Nuk ka mision të lehtë. Misionet janë të vështira.

Misionarët thonë shpesh se kësaj i thonë po i hyjmë detit në këmbë. Por detit mund t’i hyhet në këmbë.
Ndaj unë kam mirënjohje të thellë për punën e madhe që keni bërë dhe lidhjet që keni krijuar në një kohë relativisht të shkurtër.

E konsideroj këtë si një përpjekje të rëndësishme për përgatitjen e PD për fitoren e PD dhe ardhjen në pushtet. Por mbi të gjitha për qeverisjen e saj nesër.

Hapësirat janë të pafundme, e rëndësishme është që ekspertët më të mirë të kontribuojnë për vendin e tyre.

Ne do mbështesim shumë përpjekjet tuaja dhe nesër në pushtet ajo do materializohet me sukses të plotë. Sepse investimi në elitën e kombit është investimi më cilësor dhe më i rëndësishëm për të ardhmen e tij,” tha Berisha duke shtuar se tani është koha që të bashkojmë të gjithë forcat që emigracioni dhe diaspora të votojnë.

“Shpreh bindjen se fjala juaj sot, e atyre që kanë ndenjur zgjuar deri në orën 2 të natës në SHBA për të përcjellë mesazhin e tyre, është një mesazh i shkëlqyer urimi që ju u dërgoni shqiptarëve në Shqipëri dhe kudo që janë.

Ky takim, këto diskutime, janë dëshmi e ndjenjave, dëshmi e përkushtimit tuaj ndaj këtij kombi dhe këtij vendi.

Përkushtim për të cilin Shqipëria ka nevojë jetike, PD ka nevojë jetike. Ndryshimi i drejtimit të këtij vendi ka nevojë jetike.

Vendi është në një rrokullisje. E pret këtë vit të ri vërtet në një gjendje si asnjëherë më parë.
Por përsëri viti i ri është vit i ri, është fillim i ri, është shpresë, është besim. Mesazhi juaj, jam i bindur do ketë impakt shumë pozitiv te qytetarët shqiptarë.

Meqë jemi në një kohë kur gjerësisht diskutohet për votën e emigracionit dhe diasporës, unë ju ftoj ju që të përdorni të gjithë potencialet tuaja, të gjitha lidhjet tuaja, të gjithë komunikimin tuaj, që Shqipëria të bëhet një vend i drejtë dhe të mos jetë një njollë turpi në raport me qytetarët e saj jashtë vendit.
Shqipëria është i vetmi vend që nuk lejon qytetarët e saj jashtë vendit të votojnë. Por ju jeni të rinj të gjithë, por po të kthehemi në kohërat e mëparshme, është një reminishencë e qëndrimit diktatorial ndaj shqiptarëve që jetonin jashtë vendit.

Ka një shkak kryesor pse nuk votojnë, sepse Edi Rama nuk do që të votojnë. Në vitin 2013 unë i dërgova ligjin dhe ai e refuzoi ligjin duke thënë se nuk marr pjesë në zgjedhje nëse voton emigracioni dhe diaspora,: tha Kryetari i Partisë Demokratike duke u shprehur qartë se tani është koha që të bashkojmë të gjithë forcat që emigracioni dhe diaspora të votojnë.

“Ne po diskutojmë se si të bëjmë Shqipëria të përfitojë nga ekselencat e saj kudo që janë. Por kjo i shëmbëllen asaj përpjekje që si të afrojmë njerëz që janë shqiptarë, por jo shqiptarë. Se nuk lejohen të votojnë.

Së dyti, po njerëzisht do u kërkoja. E tha Belindi shumë qartë thirrjen e tij. Përpiquni t’u dërgoni kandidatëve tanë, në Tiranë dhe të gjitha qytetet e vendit, çdo mendim, çdo ide, çdo alternativë që ju besoni se përmirëson jetën e qytetarëve shqiptarë, se përmirëson alternativën e PD për ta.

Ndaj edhe një komunikim i vazhdueshëm me kandidatët tanë, direkt, pasurimi i programit të tyre dhe alternativave, mund të ishte një ndihmë shumë e madhe,” tha Kryetari i Partisë Demokratike, Sali Berisha duk ebërë të ditur se ka dosjen se si qeveria më e korruptuar ka korruptuar ambasadorin britanik ndërsa përfundoi:

“Kjo është një betejë, një zonjë shtroi me të drejtë se si ajo e priti shpalljen non-grata nga qeveria britanike. Nuk doja të ndalesha te kjo, por do them vetëm dy fjalë. Kjo është një dëshmi më flagrante e bashkëpunimit të korrupsionit shqiptar dhe ndërkombëtar.

Kjo është dëshmia më flagrante se si një qeveri e korruptuar në çdo qelizë, korrupton një ambasador.
Këto që i them këtu, do ua faktoj shumë mirë, se tani unë disponoj dosjen e problemit. Se si një qeveri, korrupton një ambasador të një vendi të mrekullueshëm, të një vendi të mahnitshëm, të një vendi që ka kontribute të mëdha në lirinë e botës siç është Britania.

“Me mashtrime në çdo faqe që ka shkruar. E njëjta gjë është se si korrupsioni i kësaj qeverie, me korrupsionin e multi-miliarderit George Soros, korruptoi një ambasadore, dhe jo vetëm për të marrë një vendim pa asnjë fakt, pa asnjë provë, pa asnjë bazë. Me qëllimin e vetëm për të dëmtuar opozitën dhe ndihmuar qeverinë më të të korruptuar.

Kjo dëshmon se sa agresive është kjo qeveri dhe sa korruptive është kjo qeveri. Arrin të krijojë ombrellë me korrupsion ndërkombëtar, duke luftuar antikorrupsionin. E vërteta është se në nëntë vite nuk kam bërë asgjë përveç luftës ndaj korrupsionit.

Kjo dëshmon se në çfarë situate kastrofale është ky vend. Sa jetike është ndërhyrja e çdo shqiptari për të shpëtuar këtë vend. Kjo do ndodhë. Unë jam i bindur se do ndodhë,” tha Sali Berisha duke e mbyll fjalën me një urim të përzemërt:

“Për ju që jeni këtu. Për anëtarët dhe mbështetësit e këtij departamenti dhe të gjithë ata që ndjekin zhvillimet në vendin e tyre dhe punën e këtij departamenti. I garantoj se PD pret më shumë interes dhe mirënjohje kontributin e tyre.

Gëzuar festën e Vitit të Ri!”