OBSH bën thirrje për vaksinim më të lartë në Evropën Lindore

Zyra për Evropë e Organizatës Botërore të Shëndetësisë, OBSH, ka bërë thirrje për rritje të përpjekjeve për vaksinim kundër koronavirusit në Evropën Lindore, duke paralajmëruar se vala e variantit Omicron po niset andej.

Drejtori për Evropën në OBSH, Hans Kluge tha se në dy javët e fundit, rastet me koronavirus janë rritur më shumë se dyfish në gjashtë shtete, Armeni, Azerbajxhan, Bjellorusi, Gjeorgji, Rusi dhe Ukrainë.

“Siç është pritur, vala e Omicronit po bartet në lindje,” tha Kluge.

Dega e OBSH-së për Evropën krahason 52 shtete, përfshirë disa në Azinë Qendrore.

Kluge tha se ritmi i vaksinimit është relativisht i vogël në disa pjesë të këtij rajoni.

Më pak se 40 për qind e personave mbi 60-vjeç janë vaksinuar plotësisht në Bosnje Hercegovinë, Bullgari, Kirgizi, Ukrainë dhe Uzbekistan, tha Kluge duke shtuar se në Bullgari, Gjeorgji dhe Maqedoninë e Veriut më pak se 40 për qind e punëtorëve shëndetësorë kanë marrë të paktën një dozë të vaksinës kundër COVID-19.

Drejtori për Evropën në OBSH, Hans Kluge, raporton RFE, tha se duke pasur parasysh shtrirjen e variantit Omicron dhe qarkullimin e variantit Delta në lindje, tani nuk është koha për të lehtësuar masat që dihet se funksionojnë në luftim të pandemisë.

Sipas Kluge, në mesin e këtyre masave përfshihet shmangia e ngjarjeve me shumë persona, vendosja e maskës në ambiente të brendshme dhe kryerja e testeve të shpejta për të identifikuar sa më herët rastet e infektimit.