OBSH formon grup të ri për hetimin e origjinës së koronavirusit
Organizata Botërore e Shëndetësisë, OBSH, tha sot se po krijon një grup të ri për të hetuar origjinën e koronavirusit të ri përmes së cilit synon të mbajë larg “debatet politike” për këtë çështje.
Pamundësia e OBSH-së për ta thënë se ku dhe si filloi përhapja e koronavirusit, raporton RFE, ka nxitur tensione mes vendeve të saj anëtare, Kinës dhe SHBA.
Rastet e para me koronavirusin e ri u zbuluan për herë të parë në Wuhan të Kinës në fund të vitit 2019, por ende shumë pak dihet për origjinën e këtij virusi.
OBSH u bëri thirrje të gjitha qeverive që të bashkëpunojnë për të përshpejtuar studimet lidhur me origjinën e pandemisë COVID-19 dhe “për të depolitizuar situatën”.
Grupi i ri që do të merret me origjinën e koronavirusit të ri është quajtur Grupi Shkencor Ndërkombëtar Këshillimor për Origjinat e Patogjenëve të Ri.
“Të gjithë duhet të punojmë së bashku. Jo vetëm unë, por të gjithë duan të dinë origjinën e pandemisë më të keqe në një shekull,” tha sot zëdhënësja e OBSH-së, Fadela Chaib, në një konferencë të Kombeve të Bashkuara.
Washingtoni përshëndeti planin e OBSH-së, duke potencuar rëndësinë e “studimeve të bazuara në shkencë për të gjetur origjinën e kësaj pandemie”.
Ndryshe, Presidenti amerikan, Joe Biden, në fund të muajit maj urdhëroi agjencitë e inteligjencës që të hulumtojnë përgjigjen mbi origjinën e COVID-19 dhe të raportojnë për gjetjet brenda 90 ditësh.
Në janar dhe shkurt, një ekip i OBSH-së qëndroi për katër javë në Wuhan dhe së bashku me ekspertët kinezë bënë përpjekje për të gjetur origjinën e koronavirusit.
Në raportin e tij përfundimtar, ekipi tha se virusi ndoshta ishte transmetuar nga lakuriqët tek njerëzit përmes një kafshe tjetër. Ai tha se një rrjedhje nga një laborator ishte “jashtëzakonisht e pamundur”.
Megjithatë në një dokumentar të transmetuar dje në Danimarkë, udhëheqësi i misionit të OBSH -së, Peter Ben Embarek tha se hipoteza e daljes së koronavirusit nga laboratori meriton studime të mëtejshme. Reuters i ka dërguar ekspertit Ben Embarek pyetje për të sqaruar më shumë këtë deklaratë mirëpo nuk ka arritur ta kontaktojë atë.
Një zyrtar i OBSH-së, raporton RFE, tha se deklarata e tij nuk kishte asnjë lidhje me raportin, duke shtuar se intervista ishte filmuar muaj më parë.
