OBSH: Nuk është koha për relaksim nga koronavirusi dhe gripi stinor!
Organizata Botërore e Shëndetësisë, OBSH, ka bërë thirrje për vigjilencë teksa po rritet numri i rasteve me koronavirus dhe grip stinor në Evropë.
“Kjo nuk është kohë për relaksim,” tha drejtori i OBSH-së për Evropë, Hans Kluge, duke iu referuar afrimit të stinës së dimrit.
Të 53 shtetet që përfshin OBSH-ja në Evropë, përfshirë Rusinë dhe Azinë Qendrore, janë sërish epiqendër e pandemisë së koronavirusit, pasi në to janë regjistruar 60 për qind të rasteve në nivel global, tha Kluge.
Në të njëjtën kohë, rastet me grup stinor janë duke iu afruar pikut.
Në këtë valë të re të koronavirusit nuk është duke u rritur numri i vdekjeve apo edhe i shtrimit të pacientëve në kujdes intensiv, prandaj OBSH-ja e ka përmendur rëndësinë e vaksinimit.
“Vaksinimi mbetet një prej mënyrave tona më efikase kundër grupit stinor dhe koronavirusit,” tha Kluge, duke u bërë thirrje njerëzve që të marrin dozat përforcuese sa më shpejt që është e mundur.
Për koronavirusin e ri, që shkakton sëmundjen COVID-19, është raportuar për herë të parë në dhjetor të vitit 2019 në Vuhan të Kinës.
Organizata Botërore e Shëndetësisë, raportom RFE, e shpalli koronavirusin si pandemi më 11 mars të vitit 2020. Më shumë se 6.5 milionë njerëz kanë vdekur prej shpërthimit të pandemisë në gjithë botën. Shtetet e Bashkuara kanë regjistruar numrin më të madh të viktimave, të përcjella nga India dhe Brazili.
