OBSH: Omicron nuk duhet të kategorizohet “i butë”

Organizata Botërore e Shëndetësisë, OBSH, tha se varianti Omicron i koronavirusit duket se nuk shkakton sëmurje të rënda, në krahasim me variantin Delta, por nuk duhet të kategorizohet “i butë”.

Janet Diaz nga OBSH, tha se studimet e hershme tregojnë se nga Omicron ka më pak mundësi të shtrimit të njerëzve në spital dhe se rreziku më i vogël vërehet si te të rinjtë, ashtu edhe te personat më të moshuar.

“Ndonëse Omicron duket se nuk shkakton sëmurje të rënda në krahasim me Deltan, sidomos te personat e vaksinuar, kjo nuk nënkupton se ai duhet të konsiderohet i butë,” tha Drejtori i Përgjithshëm i OBSH-së, Tedros Adhanom Ghebreyesus, para mediave në Gjenevë duke shtuar:

“Sikur edhe variantet tjera, Omicron është duke shtrirë njerëzit në spital dhe po i vret ata.”

Drejtori i Përgjithshëm i OBSH-së ka paralajmëruar një cunami të infektimeve globale.

Ndryshe, Agjencia ka regjistruar 9.5 milionë raste të reja në gjithë botën, çka shënon rritje prej 71 për qind nga java në javë. Numri i saktë i të infektuarve, raporton RFE, besohet se është shumë më i lartë pasi shumë rajone nuk janë duke testuar mjaftueshëm njerëz, apo raportimet nuk janë të plota.