OBSH: Për të luftuar pandeminë duhen edhe 16 miliardë dollarë

Organizata Botërore e Shëndetësisë, OBSH, tha se duhen edhe 16 miliardë dollarë për të mbështetur shtetet me të ardhura të ulëta për të luftuar pandeminë e koronavirusit.

Sipas OBSH, ky buxhet është i nevojshëm për të furnizuar shtetet me vaksina, teste dhe ilaçe, përmes një programi të lansuar nga Kombet e Bashkuara.

“Shkenca na ka dhënë mjetet për të luftuar COVID-19; nëse ato ndahen në botë në shenjë solidariteti, ne mund t’i japim fund koronavirusit si emergjencë globale këtë vit,” tha Drejtori i Përgjithshëm i OBSH, Tedros Adhanom Ghebreyesus.

Sipas kalkulimeve të OKB-së, 92 për qind e kontributeve të kërkuara, duhet të sigurohen nga Bashkimi Evropian dhe 20 shtetet më të industrializuara në botë, G20.

Ambasadori i OBSH-së për financim në shëndetin publik, Gordon Brown, ka kritikuar pabarazinë e madhe në shpërndarjen e vaksinave dhe qasjen në teste dhe ilaçe duke shtuar se në vendet e varfra ka shkallë të ulët të vaksinimit, ndërkohë që në shtetet e pasura ka vaksina që pritet t’iu skadojë afati.

OBSH, raporton RFE, ka për synim që 70 për qind e popullsisë botërore të vaksinohet kundër koronavirusit deri në mesin e këtij viti.