OBSH: Shumë sëmundje lindin si pasojë e vetmisë

Një në gjashtë persona në botë vuan nga vetmia, e cila, së bashku me izolimin social, mund të çojë në zhvillimin e sëmundjeve të shumta fizike, duke rezultuar me 871.000 vdekje në të gjithë botën çdo vit, thekson Komiteti i Organizatës Botërore të Shëndetësisë, OBSH.

Vetmia rrit rrezikun e goditjes në tru, atakut në zemër, diabetit, depresionit, ankthit dhe në fund të fundit vetëvrasjes, thuhet në Raportin e OBSH.

Adoleshentët e vetmuar kanë 22 për qind më shumë gjasa të arrijnë nota më të ulëta sesa bashkëmoshatarët e tyre jo të vetmuar, ndërsa të rriturit e vetmuar përballen me probleme më të mëdha kur bëhet fjalë për gjetjen ose mbajtjen e një pune.

“Një ndjenjë e dhimbshme dhe subjektive”

Ndikimi nuk është vetëm individual, por edhe shoqëror, me miliarda dollarë të shpenzuar për sistemet e kujdesit shëndetësor dhe humbje vendesh pune.

Bashkëkryetari i Komitetit të OBSH-së, Vivek Murthy, e përcakton vetminë si “një ndjenjë të dhimbshme dhe subjektive që shumë prej nesh e përjetojnë kur marrëdhëniet që na nevojiten nuk përputhen me marrëdhëniet që kemi. Izolimi social, në të kundërt, është gjendja objektive e më pak kontakteve, marrëdhënieve ose ndërveprimeve”.

Raporti vlerëson se në botën e sotme, një në tre të rritur të moshuar dhe një në katër adoleshentë janë të izoluar socialisht.

Shkaqet përfshijnë sëmundje të ndryshme, arsim të dobët formal, të ardhura të ulëta, mungesë mundësish për ndërveprim shoqëror, jetesë në vetmi dhe përdorimin e teknologjive dixhitale.

Vivek Murthy thekson se për mijëvjeçarë, njerëzit janë mësuar të komunikojnë, jo vetëm me fjalë, por edhe me shprehje të fytyrës, gjuhës së trupit, tonit të zërit ose thjesht heshtjes, dhe forma të tilla komunikimi humbasin kur njerëzit mbështeten ekskluzivisht në telefonat celularë dhe rrjetet sociale.