Oj Francë, t’këndojm… t’vajtojm, deshta me thanë
nga Agim Popoci
Sot ditë kange nuk është për shqiptarët, të cilët edhe pas 80 vjetësh që vazhdojnë dhe kërkojnë të drejtat e tyre, shohin se si pasardhësit e kriminelëve komunistë që internuan dhe vranë të gjithë ata që i dolën para, ju mbajnë leksione mbi ligësinë e marrëzinë, dhe rebelohen kur dikush ju kërkon falje!
E shqiptari ngratë, që nuk e çon dot as kokën në shtetin e tij të vjedhur dhe jo të varfër, kur merr guximin të protestoj, dhunohet dhe përmbytet në gaz lotsjellës dhe ujë me piper, rrihet dhe prangoset sapo të ketë mbaruar protestën e tij, pa e kuptuar se nga buron gjithë kjo urrejtje shtetërore mbi shqiptarët e fyer, plaçkitur dhe përdhunuar, nga shteti i tyre shqiptar!
Protesta Kombëtare e së shtunës së 28 shkurtit tregoi se oreksi i dhunës komuniste ishte shtuar edhe kur protestuesit u nisën drejt Ministrisë së Brendshme në një marshim proteste ku gazi, topi i ujit dhe policët e gatshëm të dhurojnë vetëm dhunë ishte menyja e Edi Ramës për ata që kërkojnë dorëheqjen e tij, dhe asgjë nuk ndryshoi kur u kthyen nga Drejtoria e Policisë ku kishte vetëm policë të tërbuar duke prit gjahun, dhe, vendosën të kthehen tek Kryeministria nga ishin nisur; Në rrugë e sipër ndërsa kaluan nga Vila e diktatorit Enver Hoxha, disa protestues hodhën ca bomba molotov dhe fishekzjarre, ku pa dashje zbuluan dhe burimin e kësaj dhune të shfrenuar për ata që guxojnë të protestojnë!
Reagoi Ambasada e Francës në Shqipëri!
Jo për qeverinë shqiptare që vjedhë dhe nuk ia dorëzon drejtësisë as Zv/Kryeministren që është kapur duke vjedhë nga SPAK-u dhe rrezikon 35 vjet burg, as për protestuesin e lagur, të rrahur dhe të arrestuar nga 10-12 policë sepse mbante flamurin kombëtar shqiptar në dorë, në Bulevardin ku nuk kishte më këmbë njeriu, por, për 4-5 bomba molotovi që nxinë në një cep suvanë e Vilës së diktatorit Enver Hoxha, të cilën Fondacioni francez Art Explora e ka shndërruar në Rezidencë për Artistë Ndërkombëtarë!
Kjo, pra, për përfaqësuesen e shtetit francez në Tiranë është dhunë e papranueshme ndërsa dëmet që mund të fshihen edhe me një leckë, janë të patolerueshme!
E drejta për të protestuar nuk është e pajtueshme me asnjë formë dhune, thotë Ambasada e Francës në Shqipëri, as kur ky Fondacioni është ngritur në një Vilë të ndërtuar në një tokë të rrëmbyer, pronarët e së cilës janë dëbuar dhunshëm nga diktatori Enver Hoxha, as kur qytetarët përdhunohen nga 1.350 policë të mobilizuar deri në dhëmbë në protestën në të cilën vetë Policia e Shtetit thotë se ishin mbi 1000 vetë!
Apo, pak është edhe kjo dhunë që servir shteti i Edi Ramës, i cili akuzon pa rreshtu për 35 vjet shqiptarët për “tokë të xanun”, po këtë lloj toke që ai vetë e zë dhe ia falë Fondacionit francez Art Explora, dhe, vetëm veprimet e shqiptarëve vazhdon i dinë si marrëzira, ligësira dhe verbëri!
Ndoshta protestuesit i bijnë kot në qafë Edi Ramës, sepse po të mos ishte dhuna e shtetit francez ndaj protestuesve “Jelekë Verdhë” dhe Gjeneral Llumi i cili erdhi ato ditë në krye të Ministrisë së Brendshme, magjitë e dhunës me gaz lotsjellës nga Serbia ndaj demokratëve të Saliut, Kryeministri Rama as që do ti shijonte ndonjëherë!
Sot është e qartë se Ambasada e Francës në Shqipëri kërkon më shumë dhunë ndaj atyre që guxojnë dhe protestojnë pse nuk kanë bukë për të ngrënë dhe hajduti nën petkun e ministrit nuk arrestohet dot nga SPAK sepse mbrohet nga Edi Rama, e për kuriozët e recetës franceze për trajtimin e protestuesve ajo është zbatuar në vepër në Parisë ndaj protestuesve “Jelekë Verdhë”, ku për 30 ditë, 17 Nëntor – 17 Dhjetor 2018, mbetën të vrarë 10 protestues, mbi 1000 të plagosur dhe 4.570 u arrestuan!
Por, Ambasada e Francës në Shqipëri nuk e ka vetëm me protestuesit, kërkon ndëshkim edhe për ata që nuk e ruajnë siç duhet një Fondacion francez ndonëse është ngritur në tokë të rrëmbyer, arsye kjo që Kryeministri shqiptar edhe shkarkoi Drejtorin e Përgjithshëm të Policisë, Ilir Proda.
A thue mos fola keq?… Po lypi t’falun… Ashtu si Gjergj Fishta, jo asaj mbesës së kriminelit komunist Hysni Kapo që e cilëson skuzim faktin se protestuesit nuk e dinin se është Rezidencë sepse ajo nuk e di ç’është falja, ajo madje mburret ashtu si nipi i Barba Pilos me gjyshin, edhe pasi Aranit Hoxha në librin e tij “Gjëmat e komunizmit në trevën e Vlorës” e argumentoi se vetëm në trevën e Vlorës këta dy kriminel vranë 257 vlonjatë, por, të gjithë protestuesve të cilët nën këtë dhunë e kanë të gjithë të drejtën e botës të protestojnë si “Jelekë Verdhë”, meqë Edi Rama vazhdon e thotë se nuk negocion nën presion dhe nga ana tjetër dhuron vetëm dhunë e varfëri!
Pastaj, Edi Rama, jo Ambasadën e Francës në Shqipëri, por, Presidentin e saj Emannuel Macron le ta pyes pse e uli kokën dhe negocioi me protestuesit!
Këtu merr edhe kuptimin akuza që Edi Rama nuk e heq nga goja “Fajet i ka Saliu”, ndryshe, sikur ti trajtonte kriminelët komunistë siç i trajtoi e gjithë bota, sot Edi Rama nuk do të ishte Kryeministër por shitës i ikonave, atyre që Kryeministri socialist, Fatos Nano, rrëfente se i ka vjedhur!
E ata qytetarë që vazhdojnë e protestojnë duke kërkuar të drejtën e tyre edhe kur Edi Rama i kërcënon me dhunë dhe terror shtetëror, dhe në fund edhe i akuzon pa rreshtur, ndihmuar edhe nga Ambasada e tij e dashur e Francës në Shqipëri, janë të qartë me nipin e Spiro Kolekës dhe mbesën e Hysni Kapos, sepse kështu kanë vepruar si mbesa e Heinrich Himmlerit ashtu dhe vajza dhe nipi i Stalinit që janë mburrur me gjyshërit e tyre pavarësisht krimeve të tyre makabër, duke e vazhduar jetën me hapjen e qendrave kulturore!
Gjithsesi, si kulak, si ballist, si malok ose si alpin, ky shqiptari me dinjitet që proteston kundër onturazhit kriminal të Edi Ramës, e pyet veten nëse ka vend për mëkatarin e pashpresë, që ka lënduar të gjithë njerëzimin vetëm për të shpëtuar shpirtin e tij, ashtu si këngëtari dhe kompozitori i njohur BoB Marley, i cili ishte shumë i qartë:
Ti ju jep mirësinë, ata i fshijnë këmbët me të. Ti ju jep besimin dhe ata e përdorin kundër teje. Ti ju jep zemrën dhe ata e thyejnë. Ti ju jep shpirtin, dhe ai vuan. Dhe pastaj ata pyesin veten se nga vjen gjithë kjo egërsi!
