OKB: Izraeli të përgjigjet për krimet e mundshme! SHBA dhe Gjermania votuan kundër
Këshilli i OKB për të Drejtat e Njeriut sot ka miratuar Rezolutën ku theksohet se Izraeli duhet të mbajë përgjegjësi për krimet e mundshme dhe krimet kundër njerëzimit, gjë që Izraeli e hodhi poshtë si “tekst të ngatërruar”.
Për Rezolutën votuan 28 shtete, 13 abstenuan ndërsa gjashtë ishin kundër, ndër të cilat SHBA dhe Gjermania, Pas miratimit të Rezolutës, përfaqësuesit e disa shteteve duartrokitën në Këshill.
Në Rezolutë theksohet “nevoja për të garantuar përgjegjësinë për të gjitha shkeljet e ligjit humanitar dhe ligjit ndërkombëtar për të drejtat e njeriut në mënyrë që ti jepet fund pandëshkueshmërisë”.
Rezoluta “shpreh shqetësimin e madh për shkak të raportimit për shkelje serioze të të drejtave të njeriut dhe të drejtës ndërkombëtare humanitare, duke përfshirë këtu krimet e mundshme të luftës dhe krimet kundër njerëzimit në territorin e okupuar palestinez.”
Përfaqësuesja e përhershme e Izraelit në OKB në Gjenevë, Meirav Eilon Shahar, akuzoi Këshillin se “ka kohë që ka braktisur popullin izraelit dhe po mbrojnë vazhdimisht Hamasin”.
“Sipas rezolutës që sot është para jush, Izraeli nuk ka të drejtë të mbroj popullin e vet, deri sa Hamasi ka të gjitha të drejtat të vras dhe keqtrajton izraelitët e pafajshëm. Vota ‘për’ është votë për Hamasin,” tha Shahar.
Ndonëse SHBA paralajmëroi votën kundër rezolutës sepse nuk thekson dënimin specifik për shkak të sulmit të Hamasit më 7 tetor në Izrael dhe nuk flet për “natyrën terroriste të sulmit”, Washingtoni tha që Izraeli nuk ka bërë sa duhet që të ul dëmet ndaj popullsisë civile, e Përfaqësuesja amerikane në Këshill, Michele Taylor, tha se SHBA kërkon nga Izraeli të ul numrin e operacioneve ushtarake kundër Hamasit për shkak të operacioneve humanitare në mënyrë që të shmangen viktimat civile, e shoqatat humanitare të realizojnë misionet e tyre në siguri të plotë.
Ndryshe, Këshilli i OKB për të Drejtat e Njeriut, që takohet disa herë në vit, është organi i vetëm ndërqeveritar i cili merret me mbrojtjen e të drejtave të njeriut në gjithë botën dhe mund të miratoj hetime për shkeljen e tyre.
