Omicron në Shqipëri, Komiteti Teknik: S’ka ndryshim të masave, nata e ndërrimit të viteve pa orë policore
Varianti i koronavirusit Omicron është prezent në Shqipëri, ka bërë të ditur sot Komiteti Teknik i Ekspertëve duk eshtuar se masat do të vijojnë të mbeten të pandryshuara, ora policore do të vijojë të jetë 23:00 deri në 06:00 të mëngjesit, me përjashtim me natën e ndërrimit të viteve.
Kreu i Komiteti Teknik të Ekspertëve, Mira Rakacolli, tha me këtë rast se pas dërgimit të mostrave në Gjermani është konfirmuar prania e Omicron megjithatë në Shqipëri vijon të mbizotërojë varianti Delta.
“Niveli i masave që janë në fuqi është i përshtatshëm për të përballuar situatën. Mbeten në fuqi masat që janë. Por përhapja e Omicron në botë, bën të domosdoshëm respektimin e përgjegjshëm të masave. Të gjithë studiuesit po bëjnë thirrje për përshpejtim të procesit të vaksinimit, sepse po bëhet e qartë se infektohen më tepër të pa vaksinuarit dhe humbjet e jetës janë te të pa vaksinuarit. Sidomos kjo bëhet e ndjeshme në kushtet e pranisë së variantit Omicron.
Vaksinimi s’është zgjedhje personale, por përgjegjësi kolektive. Jemi në fundvit, vjet patëm raste të rritura për shkak të mosrepspektimit të masave. Të respektohen standardet këtë vit e të përdoret maska. Ora policore vijon të mbetet e njëjtë, përjashtim të natës së ndërrimit të viteve”, tha Rakacolli duke sqaruar vendimin e Komitetit Teknik të Ekspertëve për të hequr orën policore natën e ndërrimit të viteve.
“Ora policore nuk ka lidhje me organizimin e aktivitetit, por me lirimin e lëvizshmërisë së njerëzve përgjatë asaj nate. Do të jenë të lejuara sipas të gjitha përcaktimeve që janë bërë me kohë, lidhur me standardin e grumbullimit dhe kapacitet. Ora policore nuk ka lidhje me këtë,” u shpreh kreu i Komitetit Ekspertëve ndërsa foli dhe për vendimin e Ministrisë së Shëndetësisë për të rikonstruktuar Spitalin Infektiv, duke theksuar se të gjithë pacientët me koronavirus do të marrin shërbimin te Spitali Covid 3. Sipas saj, Ministria ka gati të gjithë skenarët për struktura të tjera, nëse do të ketë numër të lartë shtrimesh në spital nga Covid-i.
“Në kuadrin e përmirësimit të strukturave tona shëndetësore dhe rritjen e standardeve, në program të qeverisë është edhe rikonstruksioni i Spitalit Infektiv, që është një godinë gati gjysmëshekullore. Është menduar mirë dhe është organizuar mirë, që njerëzve që kanë nevojë, sidomos ata që vuajnë me Covid dhe trajtohen në Spitalin Infektiv, do jenë për momentin në Spitalin Covid 3. I kemi bërë skenarët gati, që nëse do kemi shtrime më shumë, do të ketë struktura të tjera për këta pacientë. Urgjencat kirurgjikale nuk do të ofrohen në ambientet e QSUT, për një periudhë, por do të ofrohen në dy spitale të tjera universitare, Trauma dhe Shefqet Ndroqi. Nga e diela deri të enjten, do të jenë te Trauma, ndërsa të premte e të shtunë do jenë te Shefqet Ndroqi. Janë marrë të gjitha masat që mos të ketë asnjë lloj ulje të nivelit të shërbimit”, theksoi ajo.
