ONM kishte vërejtje, KPK kalon kreun e Gjykatës Administrative
Komisioni i Pavarur i Kualifikimit, KPK, konfirmon në detyrë kryetarin e Gjykatës Administrative të Shkallës së Parë në Tiranë, Eriol Roshi, edhe pse sipas ONM, mbajtja e një shume prej 1.5 milionë lekësh jashtë sistemit bankar nga Roshi, nuk ishte normale .
Vettingu ndaj gjyqtarit Roshi, sipas trupit gjykues Genta Tafa Bungo, Lulzim Hamitaj dhe Valbona Sanxhaktari, është bërë në 3 kriteret, atë të pasurisë, figurës dhe aftësive profesionale.
Sipas Komisioni të Pavarur të Kualifikimit bazuar dhe në informacionin e përcjellë nga ILDKPKI, gjyqtari ka bërë deklarim të saktë të pasurisë, ka burime financiare të mjaftueshme, s’ka fshehje pasurie dhe nuk ka bërë deklarim të rremë.
Hhetimi pasuror ishte përqendruar në blerjen e një apartamenti në Tiranë, kursimit të shumës 1,5 milionë lekë dhe blerjes së një automjeti.
KPK tha në seancën dëgjimore se është shqyrtuar edhe një denoncim publik për gjyqtarin, bërë në një emision investigativ. Bazuar në relacionin e lexuar nga relatorja Valbona Sanxhaktari, gjyqtari Eriol Roshi është pronar i një apartamenti me sipërfaqe 110 metra katrorë, të blerë për 7.9 milionë lekë.
Si burim krijimi, gjyqtari ka deklaruar marrjen e një kredie bankare prej 6.3 milionë lekësh si dhe rreth 1.5 milionë lekë kursime nga shitja e një apartamenti në bashkëpronësi me prindërit. Sipas Sanxhaktarit, pas hetimit administrativ vlerësohet se gjyqtari kishte burime të mjaftueshme për blerjen e apartamentit në vitin 2015.
Sipas hetimit, rezultoi se gjyqtari Roshi zotëronte pjesë takuese 1/ 3 e një apartamenti të blerë nga babai për 49 mijë euro në vitin 2006 dhe të shitur për 55 mijë euro në vitin 2012. Gjithashtu, gjyqtari ka në pronësi edhe një makinë tip “Mercedes Benz”, e blerë në vitin 2014 me vlerë 6 mijë euro, për të cilën nuk u ngritën dyshime.
Relatorja Valbona Sanxhaktari tha se nga hetimet e kryera nga KPK, zoti Roshi ka bërë deklarim të pasurisë në përputhje me ligjin, nuk ka fshehje të pasurisë dhe as deklarim të rremë.
Për sa i përket kriterit të aftësive profesionale, sipas komisionit Roshi ka marrë vlerësim pozitiv.
Ndërkohë, i vetmi problem i diskutuar nga ONM është mbajtja e një shume prej 1.5 milionë lekësh jashtë sistemit bankar. Sipas Theo Jacobs, kjo nuk është normale, ndërsa pyeti Roshin se ku i kishte mbajtur për 4 vite.
Që nuk është normale këtë e dinë të gjithë qytetarë e Republikës së Shqipërisë që nuk janë gjyqtarë dhe prokurorë, dhe pas këtij vendimi të KPK, pritet reagimi i ONM.
