Operacioni me 18 të arrestuar, SPAK: Provat që nga viti 2011, do të ekzekutohet çdo urdhër arresti
Kreu i SPAK, Arben Kraja, një përfaqësuese e Prokurorisë së Posaçme, SPAK, dhe Drejtori i Përgjithshëm i Policisë, Gledis Nano kanë zbardhur detajet nga operacioni i koduar “Golden bullet” i cili u zhvillua sot në disa qytete të vendit duke u finalizuar me 18 arrestime dhe disa urdhër arreste të personazheve të njohur të krimit.
“Kushdo do të ketë të dokumentuara pasuri të paligjshme dhe të pa justifikuara do të sekuestrohen. BKH ka qenë shumë e përfshirë. Grupi që ka kryer hetimet ka qenë e përbërë nga 3 prokurorë. Kanë bërë punë shembullore në këtë rast. Plotësimi i BKH është një proces. Grupi i dytë po bën trajnimin, në mes të qershorit ata mbarojnë trajnimin dhe do të jenë të gatshëm për të kryer punën. Policia vazhdon të jetë në aksion. Nuk kemi asnjë analizë për momentin. Do të vazhdojnë procedurat për ekzekutimet e vendimeve të gjykatës. Çështja është në hetim. Do të kemi komunikime të tjera të nevojshme dhe do të bëjmë me dije ngjarjet për të cilat janë grumbulluar prova të reja”, tha Arben Kraja deri sa përfaqësuesja e SPAK tha se provat janë grumbulluarnga viti 2011 dhe të implikuar janë 8 grupe kriminale, në Tiranë, Elbasan dhe Durrës.
“Janë kryer veprime intensive për mbledhjen e provave të nevojshme. Provat datojnë nga viti 2011 deri më tani. Sikundër e kuptuat një pjesë janë ekzekutuar dhe një pjesë jo, nuk mund të japim ende të dhëna të plota. Kemi 8 grupe kriminale që kanë operuar në Tiranë, Elbasan dhe Durrës”, tha përfaqësuesja e SPAK.
Duke bërë të ditur se deri tani janë ekzekutuar 18 masa sigurie, Drejtori i Përgjithshëm i Policisë, Gledis Nano tha se ky operacion nuk do të ndalojë e do të finalizohet me ekzekutimin e të gjithë urdhër arresteve.
“Operacioni i koduar “Golden bullet”, që është në vijim, ka nisur menjëherë pas arrestimit të shumë të kërkuarit Nuredin Dumani, i cili u arrestua gjatë operacionit policor të koduar “Arratia”, që u zhvillua nga strukturat e Policisë së Shtetit, në bashkëpunim me Prokurorinë pranë Gjykatës së Rrethit Gjyqësor Elbasan.
Pas veprimeve intensive hetimore të kryera nga strukturat e Policisë së Shtetit, në bashkëpunim me SPAK-un dhe Prokurorinë pranë Gjykatës së Rrethit Gjyqësor Elbasan, si dhe në bazë të informacioneve të mara nga burime të ndryshme, u krijuan dyshimet e arsyeshme për përfshirjen e shumë personave të tjerë, në veprimtari kriminale kundër personit dhe në fushën e krimit të organizuar,” tha Nano duke shtuar se menjëherë pas nxjerrjes së urdhër arresteve për 32 persona dhe urdhrave për kryerjen e kontrolleve në 28 banesa, të lëshuara nga Gjykata e Posaçme e Shkallës së Parë Kundër Korrupsionit dhe Krimit të Organizuar, Policia e Shtetit organizoi operacionin policor të koduar “Golden bullet”, për ekzekutimin e masave të sigurisë “Arrest në burg”.
Operacioni u shtri në disa qarqe, në Tiranë, Durrës, Elbasan dhe Lezhë. Në operacion u përfshinë forcat speciale RENEA, FNSH, Drejtoria e Forcës së Posaçme Operacionale, Drejtoria Kundër Krimeve ndaj Personit e Pasurisë, Drejtoria Hetimore, si dhe Drejtoritë Vendore të qarqeve që përmenda. Ky operacion u drejtua nga Drejtoria e Përgjithshme e Policisë së Shtetit. Deri tani janë ekzekutuar gjithsej 18 masa sigurie, nga këto 9 persona u kapën gjatë operacionit, ndërsa për 9 të tjerët, masat e sigurisë u ekzekutuan në disa IEVP, sepse këta shtetas janë arrestuar më parë, për vepra të ndryshme penale.”
Dhe jo vetëm kaq! Gjatë operacionit, tha Drejtori i Policisë së Shtetit, si rezultat i kontrollit të banesave dhe hoteleve janë sekuestruar 3 armë zjarri (konkretisht 2 kallashnikovë dhe 1 pistoletë), 2 antiplumb si ato që përdor Policia e Shtetit, municion luftarak, rreth 17 mijë euro, aparate celulare, fatura bankare, automjete dhe sende të tjera të përfituara nga veprimtaria kriminale.
“Mbetem i vendosur për të pastruar nga radhët e Policisë së Shtetit ata punonjës policie që shpërdorojnë detyrën apo më keq akoma bëhen palë me krimin, si dhe inkurajoj agjencitë ligjzbatuese që të hetojnë çdo rast të përfshirjes së punonjësve të Policisë, në veprimtari të kundërligjshme,” tha Drejtori i Përgjithshëm i Policisë, Gledis Nano, duke ftuar qytetarët që të bashkëpunojnë me Policinë e Shtetit, për të parandaluar, evidentuar he goditur paligjshmërinë, krimin në përgjithësi dhe atë të organizuar në veçanti, me qëllim krijimin e një ambienti shumë më të sigurt për qytetarët dhe aspak të sigurt për shkelësit e ligjit.
Ndryshe, deri më tani janë ekzekutuar 18 masa sigurie: Nuredin Dumani, Henrik Hoxha, Ardian Uzuni, Altin Ndoci, Skerdi Tasi, Leonard Palushi, Fatos Gosa, Erion Alibej, Gentajan Sharra, Florenc Cekrezi, Elvis Koci, Ilirjan Feci, Petrit Qoli, Agron Qoli, Agron Qafa, Artan Plaka, Besjan Xhixha.
