Opiumi i partisë!

nga Romeo Gurakuqi

Ka marrë përsipër drejtimin e Bashkisë së Tiranës, por më rezulton se zoti Veliaj nuk njeh historinë e qytetit që ai po drejton dhe ende nuk e din, se ka një radhë të personaliteteve që kontribuan në shndërrimin e Tiranës në Kryeqytet të Shqipërisë, gati një shekull më parë.

Me propozim të organizatës bazë të partisë numër 5, ai po vendos një monument për Selam Musain, në hyrje të Komunës, ndërkohë që radha e rivlerësimeve të arsyeshme duhej të prirej para së gjithash, drejt etërve të rithemelimit të vitit 1920.

Në prag të 100-vjetorit të Tiranës Kryeqytet, Bashkia duhet të kishte një ekip vlerësuesish të ndershëm (jo komunistë dhe jo diletantë), për të plotësuar me monumente dhe me emrat e të munguarve të mëdhenj të këtyre 75 viteve, sheshet e rrugët e reja të Tiranës. 

Por siç duket, edhe pas kaq kohësh, opiumi i partisë ka bllokuar çdo bllok arsyetimi të njerëzve të rinj të organizatës së vjetër.

Vërshimi i sotëm i socialistëve dhe kooperativistëve të zonës së parë në Këshillin Bashkiak të kryeqytetit, përfundimisht ka hequr çdo mundësi korrigjimi dhe rivlerësimi të ndershëm për figurat që themeluan Tiranën kryeqytet të shtetit, ndërtuan dikasteret themelore qeverisëse, projektuan dhe organizuan sistemin arsimor, vendosën bazat e diplomacisë shqiptare dhe i dhanë gradualisht qytezës së dikurshme orientale, një pamje të vërtetë dhe të rregullt europiane.

Dua të kujtoj veç disa prej atyre që duhej të kishin nderimin e posaçëm në Tiranën e 100 vjetorit: Aqif Pashë Biçakçiu, Imzot Luigj Bumçi, Mihal Turtulli, Mehmet Konica, Ismail Ndroqi, Abdi Bej Toptani, Mehdi bej Frashëri, Sotir Peci, Pandeli Evangjeli, Tefë Curani, Dhimitër Kacimbra, Sulejman Delvina, Karl Gurakuqi, Rexhep Mitrovica, etj. etj.